បរទេស ៖ មេដឹកនាំអ៊ុយក្រែន លោក Volodymyr Zelensky កាលពីថ្ងៃសុក្រ បានព្រមានថា លោក វ្ល៉ាឌីមៀ ពូទីន ប្រធានាធិបតីរុស្ស៊ី ចង់គ្រប់គ្រងលោក ដូណាល់ ត្រាំ បន្ទាប់ពីប្រមុខវិមានក្រឹមឡាំង បានសរសើរមេដឹកនាំសហរដ្ឋអាមេរិករូបនេះ ដោយលោក ពូទីន និយាយថា លោកត្រៀមខ្លួន សម្រាប់កិច្ចពិភាក្សាជាមួយ Trump។

លោក Zelensky បាននិយាយ ក្នុងអំឡុងពេលសុន្ទរកថាប្រចាំថ្ងៃ នៅលើប្រព័ន្ធផ្សព្វផ្សាយសង្គមថា «ខ្ញុំមានទំនុកចិត្តថា គ្មានឧបាយកលណាមួយ របស់រុស្ស៊ី នឹងទទួលជោគជ័យ ទៀតទេ»។

លោក ពូទីន បានសរសើរលោក Trump ថា ជាមេដឹកនាំ «ឆ្លាត» និង «ច្បាស់លាស់» ដែលអាចរារាំងជម្លោះ មិនឱ្យចាប់ផ្តើម។ មេដឹកនាំរុស្ស៊ីរូបនេះ បាននិយាយថា លោករង់ចាំ កិច្ចពិភាក្សាជាមួយ Trump ខណៈ Trump បានប្រកាស កាលពីថ្ងៃព្រហស្បតិ៍ដែរថា លោកនឹងជួប លោក ពូទីន ឆាប់ៗ។

លោក ពូទីន បានប្រាប់អ្នកយកព័ត៌មាន របស់ទូរទស្សន៍រដ្ឋរុស្ស៊ីថា «យើងតែងតែនិយាយ ហើយខ្ញុំចង់បញ្ជាក់រឿងនេះ ម្តងទៀតថា យើងត្រៀមខ្លួនរួចជាស្រេច សម្រាប់ការចរចាទាំងនេះ លើបញ្ហាអ៊ុយក្រែន»។

លោក ពូទីន បាននិយាយទៀតថា បើមានវត្តមាន លោក Donald Trump ជាប្រធានាធិបតីអាមេរិក មិនអាចមានវិបត្តិ នៅអ៊ុយក្រែន កាលពីឆ្នាំ២០២២ នោះទេ៕

ប្រភពពី AFP ប្រែសម្រួល៖ សារ៉ាត