បរទេស ៖ ក្រុមប្រឹក្សាវិនិយោគ របស់ប្រទេសថៃ ហៅកាត់ BOI បានអនុម័ត ការវិនិយោគដ៏ធំ របស់ក្រុមហ៊ុនបណ្តាញសង្គម TikTok ដែល ជាវេទិកាចែករំលែកវីដេអូដ៏ពេញនិយម ក្នុងទំហំទឹកប្រាក់ជាង ១២៦ពាន់លានបាត ឬ ៣.៧៦ ពាន់លានដុល្លារ ក្នុងការបង្កើតមជ្ឈមណ្ឌលទិន្នន័យ នៅក្នុងប្រទេសថៃ។

កាសែត The Nation បានចេញផ្សាយ កាលពីថ្ងៃពុធថា សម្រាប់ការវិនិយោគនេះ TikTok ដែលជាក្រុមហ៊ុនបុត្រសម្ព័ន្ធរបស់ ByteDance នឹងបង្កើតម៉ាស៊ីនមេ និងហេដ្ឋារចនាសម្ព័ន្ធ ដែលពាក់ព័ន្ធ នៅក្នុងមជ្ឈមណ្ឌលទិន្នន័យ មានប្រសិទ្ធភាពខ្ពស់ មានទីតាំង នៅទីក្រុងបាងកក, ខេត្ត Samut Prakan និង ខេត្ត Chachoengsao ។

ការអនុម័តនេះធ្វើឡើង បន្ទាប់ពីមានការកើនឡើង នៃការវិនិយោគឌីជីថល នៅក្នុងប្រទេសថៃ ដោយក្នុងនោះ កាលពីឆ្នាំ២០២៣ បានឃើញពីលំហូរនៃការវិនិយោគដ៏សំខាន់ នៅក្នុងមជ្ឈមណ្ឌលទិន្នន័យ និងសេវាកម្មពពកពីក្រុមហ៊ុនទូទាំងពិភពលោក រួមទាំង ក្រុមហ៊ុនមកពីសហរដ្ឋអាមេរិក ចិន ហុងកុង ជប៉ុន ឥណ្ឌា អូស្ត្រាលី និងប្រទេសថៃ។ គម្រោង១៦ រួមបញ្ជូលគ្នា តំណាងឲ្យការវិនិយោគសរុប ជាង៧ពាន់លានដុល្លារអាមេរិក នេះបើតាម The Nation ដដែល៕

ប្រភពពី The Nation ប្រែសម្រួល៖ សារ៉ាត