ឯកឧត្តមទេសរដ្ឋមន្ត្រី គន់ គីម ណែនាំដល់អាជ្ញាធរមូលដ្ឋានត្រូវតាមដាននិងសង្គ្រោះស្រូវប្រាំងដែលខ្វះខាតទឹកឱ្យអស់ពីលទ្ធភាព
កំពង់ធំ៖ខណៈពេលអញ្ជើញពិនិត្យស្ថានភាពដំណាំស្រូវប្រាំងដែលខ្វះទឹកនិងខូចខាតជាង៣០០ហិកតា នៅឃុំសំព្រោជ ស្រុកស្ទោង ខេត្តកំពង់ធំ កាលពីរសៀលថ្ងៃទី២៩ ខែមករា ឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានណែនាំដល់អាជ្ញាធរមូលដ្ឋានត្រូវតាមដាននិងសង្គ្រោះស្រូវប្រាំងដែលខ្វះខាតទឹកឱ្យអស់ពីលទ្ធភាព។
នៅវាលស្រែប្រាំងដែលកំពុងខ្វះទឹក ឯកឧត្តមទេសរដ្ឋមន្ត្រី គន់ គីម បានដាស់តឿនដល់អាជ្ញាធរគ្រប់មូលដ្ឋានត្រូវធ្វើការតាមដាន និងបូមទឹកស្រោចស្រពសង្គ្រោះស្រែស្រូវកសិករឱ្យបានទាន់ពេលវេលានៅពេលដែលមានប្រភពទឹកស្រោចសព្វគ្រប់គ្រាន់ ។មិនត្រូវទុកឱ្យស្រែកសិករណាម្នាក់រងខូចខាតដែលមានប្រភពទឹកហើយអាជ្ញាធរពុំបានដឹងឬមិនបានជួយសង្គ្រោះនោះឡើយ។
ក្នុងឱកាសនេះដែរឯកឧត្តមទេសរដ្ឋមន្ត្រី បានចូលរួមសោកស្ដាយយ៉ាងខ្លាំងជាមួយប្រជាកសិករ ៤ភូមិនៅក្នុងឃុំសំព្រោជដែលមានស្រែសរុបជាង៣០០ហិកតា ដែលកំពុងខ្វះខាតទឹកស្រោចស្រពហើយពុំមានប្រភពទឹកក្នុងការបូមសង្គ្រោះឱ្យបានទាន់ពេលវេលាដែល ប្រឈមនឹងការខូចខាតឬស្វិតស្រពោនពុំទទួលបានផល។
ជាដំណោះស្រាយសម្រាប់រយៈពេលវែងឯកឧត្តម គន់ គីម បានណែនាំដល់អាជ្ញាធរភូមិ ឃុំ ស្រុក ត្រូវបង្កើតគណៈកម្មការចម្រុះក្នុងការគ្រប់គ្រងអាងទឹកនិងធ្វើការណែនាំដល់ម្ចាស់អាងស្តុកទឹកទាំងអស់ត្រូវទុកអាងសម្រាប់ស្តុកទឹកនិងបញ្ឈប់ការធ្វើស្រូវប្រាំងនៅក្នុងអាងដែលជាហេតុនាំឱ្យខ្វះខាតទឹកក្នុងការស្រោចស្រព។
សូមបញ្ជាក់ថា ស្រូវប្រាំងនៃភូមិចំនួននៅឃុំសំព្រោជ ស្រុកស្ទោង មាន ភូមិពៃ ចំបក់ខ្ពស់ ដូនល្អ និងភូមិអូររំចេក មាន២២៣គ្រួសារ និងស្រែចំនួន ៣៤០ហិកតា ដែលទើបមានអាយុកាល៦០ថ្ងៃ ៕
ដោយ៖ប៊ុនរដ្ឋា
