ប្រជាពលរដ្ឋជាងមួយពាន់គ្រួសារ នៅស្រុកស្ទឹងត្រង់ទទួលបានចង្ក្រានសន្សំសំចៃថាមពលពីឯកឧត្តម ហួត ហាក់ និងឯកឧត្តមអភិបាលខេត្តកំពង់ចាម
កំពង់ចាម៖ចង្ក្រានសន្សំសំចៃថាមពល ត្រូវបានចែកជូនប្រជាពលរដ្ឋចំនួន ១ ១៧៧គ្រួសារ នៅឃុំទួលសំបួរ ស្រុកស្ទឹងត្រង់ ខេត្តកំពង់ចាមកាលពីថ្ងៃទី២ ខែកុម្ភៈដោយមានការអញ្ជើញចូលរួមនិងចែកជូនដោយ ឯកឧត្ដម ហួត ហាក់ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានស្រុកស្ទឹងត្រង់ និងឯកឧត្តម អ៊ុន ចាន់ដា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណបក្សខេត្តកំពង់ចាម ។
ថ្លែងក្នុងឱកាសនោះ ឯកឧត្ដម អ៊ុន ចាន់ដា បានលើកឡើងថា រាជរដ្ឋាភិបាលកម្ពុជាបាននាំមកនូវការអភិវឌ្ឍ ការលើកស្ទួយកម្រិតជីវភាព បូករួមទាំងសមិទ្ធផលដែលបងប្អូន បានប្រើប្រាស់ជាក់ស្ដែងរួចហើយ ។យើងមានផ្លូវកៅស៊ូមួយខ្សែពីខ្ពបតាងួន មកដល់ទួលសំបួរ ដែលផ្សាភ្ជាប់ពីតំបន់នេះទៅទីប្រជុំជន នៅតាមមាត់ទន្លេ និងតភ្ជាប់ជាមួយផ្លូវបេតុងមួយចំនួនទៀត ហើយនឹងកសាងផ្លូវក្រួសក្រហម ពីអារក្សត្នោត តភ្ជាប់មកទួលសំបួរ បូករួមទាំងការកសាងស្ពានបេតុងមួយកន្លែងទៀតផង ។
ឯកឧត្ដម អ៊ុន ចាន់ដា បានបន្តថា គម្រោងយើងបានលើករួចហើយ នឹងមានការស្ថាបនាឆាប់ៗខាងមុខនេះ នូវផ្លូវកៅស៊ូ និងផ្លូវបេតុង តភ្ជាប់ពីតំបន់អារក្សត្នោត មកដល់ទីតាំងទួលសំបួរ ហើយនឹងការរៀបចំបន្ថែមនូវប្រព័ន្ធផ្លូវ ទាំងផ្លូវបេតុង និងផ្លូវកៅស៊ូ នៅក្នុងបរិវេណទីប្រជុំជន ដែលនៅសេសសល់ផងដែរ ។
ចំណែកឯកឧត្តម ហួត ហាក់ ដែលជារដ្ឋមន្រ្តីទេសចរណ៍ផងបានថ្លែងថា មូលដ្ឋានទេសចរណ៍ គឺសន្តិភាព ព្រោះមានសន្តិភាព ទើបមានទេសចរណ៍ ។រាជរដ្ឋាភិបាលកម្ពុជាបានចាត់ទុកវិស័យទេសចរណ៍ជា «មាសបៃតង» ព្រមជាមួយនឹងកេរ្តិ៍ឈ្មោះជាប្រទេសចំណាស់មួយនៅក្នុងពិភពលោក ដែលមានវប្បធម៌ដ៏សម្បូរបែប និងសម្រស់ធម្មជាតិដ៏ស្រស់ត្រកាល គួរជាទីប្រតិព័ទ្ធ និងចំណីអារម្មណ៍ដ៏ស្រស់ស្រាយ សម្រាប់ទេសចរជាតិ និងអន្តរជាតិ គ្រប់ជាតិសាសន៍ មកទស្សនាកម្សាន្ត ៕
ដោយ៖លី ពៅ
