រដ្ឋាករទឹកបាត់ដំបង បើកការដ្ឋានតភ្ជាប់ និងពង្រីកបណ្តាញទឹកស្អាតបំពង់ទុយោមេខ្នាតធំប្រវែងពីរគីឡូម៉ែត្រ
បាត់ដំបង៖រដ្ឋាករទឹកបាត់ដំបងបានចាប់ផ្តើមបើកការដ្ឋានថ្មី ដើម្បីពង្រីកបណ្តាញចែកចាយទឹកស្អាតបន្ថែមទៀត ដើម្បីតភ្ជាប់ទុយោបំពង់ដែកមេ និងជាបណ្តាញមេ ចេញពីស្ថានីយក្នុងក្រុងបាត់ដំបង និងចែកចាយផ្គត់ផ្គង់ទឹកស្អាតដោយឆ្លងកាត់សង្កាត់ចំនួន២ក្នុងក្រុងបាត់ដំបង និងឃុំចំនួនមួយ របស់ស្រុកថ្មគោល។
ទន្ទឹមនឹងសកម្មភាពបើកការដ្ឋានថ្មីចាប់ផ្តើមកាលពីថ្ងៃទី៣ ខែកុម្ភៈ ឆ្នាំ២០២៥ ឯកឧត្តម អ៊ុត ក្លឹង អគ្គ នាយករដ្ឋាករទឹកបាត់ដំបងនិងក្រុមការងារបានអញ្ជើញពិនិត្យមើលការដ្ឋានសាងសង់ភ្ជាប់បណ្តាញទុយោមេថ្មីនេះ ស្ថិតនៅភូមិ
បល្ល័ង្គ សង្កាត់វត្តគរ ក្រុងបាត់ដំបង ។
តាមការបញ្ជាក់របស់ឯកឧត្តម អ៊ុត ក្លឹង បានឱ្យដឹងថា នៅដើមឆ្នាំ២០២៥នេះ រដ្ឋាករទឹកបាត់ដំបង បាននិងកំពុងតែរៀបចំប្រព័ន្ធទុយោមេបណ្តាញទឹកស្អាតទៅកាន់មូលដ្ឋានគោលដៅ ស្រុក-ក្រុង មួយចំនួនបន្ថែមទៀតជំរុញការផ្គត់ផ្គង់ទឹកស្អាតជូនប្រជាពលរដ្ឋបានប្រើប្រាស់ឆាប់ៗខាងមុខ។ជាក់ស្តែងការបើកការដ្ឋានថ្ងៃនេះយើងបានពង្រីកវិសាលភាពក្នុងការចែកចាយ និងផ្គត់ផ្គង់ទឹកស្អាត ដោយបានភ្ជាប់បណ្តាញបំពង់ទុយោមេខ្នាតមុខកាត់០,៦០ម៉ែត្រ និងមានប្រវែងពីរពាន់ម៉ែត្រនៅទីនេះ ដោយឆ្លងកាត់ក្នុងសង្កាត់វត្តគរ សង្កាត់អូរម៉ាល់ ក្រុងបាត់ដំបង និងឆ្លងកាត់ឃុំជ្រៃ ស្រុកថ្មគោល ។ការងារនេះគ្រោងនឹងបញ្ចប់ក្នុងរយៈពេលមួយខែគិតចាប់ពីការចាប់ផ្តើម បើកការដ្ឋានថ្ងៃនេះ។
ឯកឧត្តមអគ្គនាយករដ្ឋាករទឹកបាត់ដំបង ក៏បានបន្ថែមឱ្យដឹងទៀតថា បន្ទាប់ពីស្ថានីយផលិតទឹកស្អាតទី៣ ស្ថិតនៅភូមិកំពង់សីមា សង្កាត់វត្តគរ ក្រុងបាត់ដំបងដែលកំពុងតែពន្លឿន ហើយនឹងត្រូវបិទបញ្ចប់ការសាងសង់នៅក្នុងឆ្នាំ២០២៥នេះដែរ រដ្ឋាករទឹកបាត់ដំបងនឹងបន្តជំរុញការពង្រីកតភ្ជាប់បណ្តាញបំពង់ទុយោទឹកមេខ្នាតធំបែបនេះ ឆ្ពោះទៅកាន់បណ្តាឃុំនៅជិតគោលដៅដូចជា ឃុំភ្នំសំពៅ នៃ ស្រុកបាណន់ ជាដើម។
សូមជម្រាបថា ស្ថានីយផលិតទឹកស្អាតទី៣ ដែលកំពុងសាងសង់បានប្រមាណពី៨៥ទៅ៩០ ភាគរយហើយនោះ មានសមត្ថភាពផលិតទឹកស្អាតក្នុងមួយថ្ងៃប្រមាណ ៥ម៉ឺនម៉ែត្រគូប។
ឯកឧត្តមអគ្គនាយករដ្ឋាករទឹកបាត់ដំបង បញ្ជាក់បន្ថែមថា សមត្ថភាពរោងចក្រផលិតទឹកស្អាតថ្មី ខាងលើនេះបូករួមជាមួយរោងចក្រផលិតទឹកស្អាតដែលកំពុងដំណើរការប្រចាំថ្ងៃ នាពេលបច្ចុប្បន្ន ចំនួន២ទីតាំងនឹងធ្វើឱ្យរដ្ឋាករទឹកបាត់ដំបងមានសមត្ថភាពក្នុងការផលិតទឹកស្អាតកើនដល់ទៅ ៨៣ ៥២០ម៉ែត្រគូបក្នុងមួយថ្ងៃ ខណៈបំពង់បណ្តាញទឹកស្អាត មានប្រវែងសរុប៩២២គីឡូម៉ែត្រនឹងមានវិសាលភាពគ្របដណ្តប់យ៉ាងទូលំទូលាយក្នុងការផ្គត់ផ្គង់ទឹកស្អាត មិនត្រឹមតែអាចគ្របដណ្តប់ក្នុងដែនសេវាកម្ម អាជ្ញាបណ្ណរដ្ឋាករទឹកបាត់ដំបង ផ្ទាល់ប៉ុណ្ណោះទេ តែអាចមានលទ្ធភាពចែកចាយទៅកាន់តំបន់ខាងក្រៅផ្សេងៗទៀត ដែលស្ថិតនៅជិតជុំវិញនោះ ដើម្បីឆ្លើយតបទៅនឹងកំណើនប្រជាពលរដ្ឋពីតម្រូវការទឹកស្អាតព្រមទាំងការអភិវឌ្ឍក្រុង និងនៅតាមទីប្រជុំជននានា ក្នុងការលើកកម្ពស់ សុខភាពសាធារណៈនិងជីវភាពរបស់ប្រជាជន ឆ្លើយតបនឹងគោលនយោបាយរបស់រាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីបានកំណត់នូវអាទិភាពគន្លឹះ ចំនួន៥ គឺ ធនធានមនុស្ស ផ្លូវ ទឹក ភ្លើង និងបច្ចេកវិទ្យា៕
អត្ថបទ-រូបភាព៖ អ៊ុក សំអាន បប.
