ភ្នំពេញ៖ ឯកឧត្ដម ឃួង ស្រេង ប្រធានគណៈបញ្ជាការឯកភាព​និងជាអភិបាល​រាជធានីភ្នំពេញ​បាន​ណែនាំ​ជាថ្មីដល់អាជ្ញាធរខណ្ឌទាំង១៤ត្រូវអនុវត្ត​ឱ្យបាន​ម៉ឺងម៉ាត់ ក្នុងការទប់ស្កាត់និងបង្ក្រាបក្រុមក្មេងទំនើង និងគ្រប់គ្រងវត្តមាន​ជន​បរទេសឱ្យបានល្អដើម្បីធានាថា ជនបរទេសដែលស្នាក់នៅក្នុងមូលដ្ឋានរាជ​ធានី​ភ្នំពេញគឺសុទ្ធតែជា ជនដែល​ស្នាក់នៅ​ដោយស្របច្បាប់។

ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នារសៀលថ្ងៃទី១០ ខែកុម្ភៈ ឆ្នាំ២០២៥ ឯកឧត្ដមឃួង ស្រេង បានបញ្ជាក់ទៀតថា អាជ្ញាធរ​ខណ្ឌទាំង១៤ និងសង្កាត់ទាំង១០៥ត្រូវម៉ឹងម៉ាត់ក្នុងការទប់ស្កាត់ និងបង្ក្រាប​ក្រុម​ក្មេង​ទំនើងនៅក្នុងមូលដ្ឋាន ហើយត្រូវណែនាំរហូតដល់ភូមិ ។សម្រាប់​អាជ្ញាធរខណ្ឌនៅជាយក្រុងឯកឧត្តមអភិបាលបានណែនាំ ឱ្យសហការជាមួយ​អាជ្ញាធរស្រុកនៃខេត្តជាប់ព្រំប្រទល់ ជាមួយរាជធានីភ្នំពេញ ដើម្បីធ្វើសកម្មភាព​ដោយប្រទាក់ក្រឡាគ្នា។

ចំណែកការពង្រឹងលើការគ្រប់គ្រងវត្តមានជនបរទេសឯកឧត្តមប្រធានគណៈបញ្ជាការឯកភាព បានចង្អុលសំដៅទៅលើជន​បរទេស​ដែលស្នាក់នៅខុនដូរ អាផាតមិន សណ្ឋាគារ ផ្ទះសំណាក់ និងផ្ទះជួល ត្រូវតែច្បាស់ថា ជនបរទេស​ដែលស្នាក់នៅ​ក្នុងមូលដ្ឋានរាជធានីភ្នំពេញ គឺជាជនស្នាក់នៅដោយស្របច្បាប់ មិនមានបទល្មើស ៕
ដោយ៖ ហេង សម្បត្តិ+ថេត វិចិត្រ