រដ្ឋមន្ត្រីក្រសួងបរិស្ថាន ផ្តួចផ្តើមឱ្យមានការរៀបចំពិធីបុណ្យកោងកាងក្នុងខេត្តកោះកុង នៅចុងខែកុម្ភៈ
(ភ្នំពេញ)៖ ក្រសួងបរិស្ថាន ដើម្បីការពង្រីកវិសាលភាពបៃតងឈានឆ្ពោះទៅជាប្រទេស អព្យាក្រឹតកាបូននៅឆ្នាំ២០៥០ បានផ្តួចផ្តើមឱ្យមានការរៀបចំពិធីបុណ្យកោងកាង នៅខេត្តកោះកុង នៅចុងខែកុម្ភៈ ឆ្នាំ២០២៥នេះ ។ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងថា ការផ្តួចផ្តើមឱ្យមានការរៀបចំពិធីបុណ្យកោងកាងនេះឡើង គឺជាផ្នែកមួយនៃយុទ្ធនាការ «ពន្លកបៃតង» ក្រោមការចង្អុលបង្ហាញពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងគោលបំណងថែរក្សាប្រព័ន្ធអេកូឡូស៊ីឆ្នេរ និងជីវៈចម្រុះ តាមរយៈការដាំស្តារព្រៃកោងកាង ។
នេះជាការលើកឡើងរបស់ អ៊ាង សុផល្លែត ក្នុងជំនួបពិភាក្សាការងារ និងផ្តល់អនុសាសន៍ណែនាំដល់ក្រុមការងាររៀបចំ ដែលដឹកនាំដោយ លោក ម៉េង ហេង ប្រធានអង្គការមេត្តាធម្មជាតិ នៅរសៀលថ្ងៃទី១១ ខែកុម្ភៈ ឆ្នាំ២០២៥ នាទីស្តីការក្រសួងបរិស្ថាន។
ប្រធានអង្គការមេត្តាធម្មជាតិ និងក្រុមការងារ បានប្តេជ្ញាចិត្តខ្ពស់ក្នុងការរួមចំណែកជាមួយយុទ្ធនាការ «ពន្លកបៃតង» របស់ក្រសួងបរិស្ថាន នឹងបន្តការដាំដុះកូនកោងកាងជាមួយប្រជាសហគមន៍ក្នុងដែនសមុទ្រឱ្យបានកាន់តែច្រើន ស្របតាមយុទ្ធសាស្រ្តចក្រាវិស័យបរិស្ថានដែលបានដាក់ចេញ គឺការបណ្តុះកូនឈើ ចែកកូនឈើ និងដាំកូនឈើច្រើនជាង ១លានដើមក្នុង ១ឆ្នាំ ។
ឯកឧត្តមបណ្ឌិត អ៊ាង សុផល្លែត បញ្ជាក់ថា ក្រសួងបរិស្ថានផ្តល់ការគាំទ្រយ៉ាងពេញទំហឹងលើសកម្មភាពទាំងនេះ ជាពិសេសដំបូងត្រូវអប់រំ និងពន្យល់ណែនាំដល់ប្រជាសហគមន៍ទាំងអស់ ឱ្យយល់អំពីសារៈសំខាន់នៃការរួមចំណែកក្នុងយុទ្ធនាការពន្លកបៃតង តាមរយៈការចូលរួមក្នុងការអភិរក្សធនធានធម្មជាតិ និងដាំដុះកូនកោងកាងដ៏មានតម្លៃនេះ ហើយនឹងផ្តល់ឱ្យពួកគាត់នូវភាពជាម្ចាស់ ក្លាយជាសហគ្រិនភាព អាចបន្តគ្រប់គ្រងសហគមន៍ដោយនិរន្តភាព និងជាប្រយោជន៍សម្រាប់មនុស្សជាតិ និងអ្នកជំនាន់ក្រោយរបស់កម្ពុជា ។
ឯកឧត្តមរដ្ឋមន្រ្តី បានជូនពរដល់ក្រុមការងារ អង្គការមេត្តាធម្មជាតិ ឱ្យការដំណើរការប្រព្រឹត្តពិធីបុណ្យកោងកាងនេះ ទទួលបានជោគជ័យ និងលទ្ធផលជាផ្លែផ្កា។
សូមជម្រាបជូនថា ព្រៃកោងកាង គឺជាជម្រកដ៏សំខាន់សម្រាប់ជីវៈចម្រុះប៉ុណ្ណោះទេ ប៉ុន្តែក៏ជាខែលការពារធម្មជាតិដ៏រឹងមាំ ពីគ្រោះមហន្តរាយធម្មជាតិ និងការប្រែប្រួលអាកាសធាតុផងដែរ ។ កោងកាងទាំងនោះ ក៏ជាចំណែកមួយក្នុងការផ្តល់ជម្រកដល់សត្វមានជីវិតនៅក្នុងទឹកដូចជា ត្រី ក្តាម និងបង្គារជាដើម ដែលធនធានទាំងនោះនឹងក្លាយជាចំណែកនៃប្រាក់ចំណូលរបស់ប្រជាសហគមន៍ក្នុងដែនសមុទ្រ។ ការដាំស្តារព្រៃកោងកាងឡើងវិញ គឺជាការវិនិយោគដ៏សំ ខាន់សម្រាប់អនាគត និងជាការចូលរួមចំណែកក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់ប្រទេសកម្ពុជា ៕
អត្ថបទ ៖ គង់ សុផុល
វីដេអូ ៖ ក្រសួងបរិស្ថាន
