ភ្នំពេញ៖ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន នៅរសៀលថ្ងៃទី១៣ ខែកុម្ភៈ ឆ្នាំ២០២៥ បានអញ្ជើញជាអធិបតី និងហត្ថលេខី តំណាងក្រសួងសាធារណការ និងដឹកជញ្ជូន ក្នុងនាមតំណាងរាជរដ្ឋាភិបាល និង​ក្រុមហ៊ុន រ៉ូយ៉ាល់រេលវេ ម.ក. (RRPLC) តំណាងដោយ អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់​រេលវេ ម.ក. (RRPLC) លើកិច្ចព្រមព្រៀងក្របខ័ណ្ឌផ្លូវដែក (Framework Agreement-FA)។

ក្រសួងសាធារណការបានឱ្យដឹងថា កម្មវិធីនេះមានការអញ្ជើញចូល​រួមពី​លោកជំទាវ ឯកឧត្តម ថ្នាក់ដឹកនាំក្រសួង គណៈ​កម្មការអន្តរក្រសួងចរចា​កិច្ចព្រមព្រៀងសម្បទានផ្លូវដែក ប្រតិភូ RRPLC និងមន្រ្តីជំនាញពាក់ព័ន្ធ។ការចុះហត្ថលេខា​លើកិច្ចព្រមព្រៀងក្របខ័ណ្ឌនេះ គឺជំហានដំបូង ដើម្បីជា​មូលដ្ឋានឈានដល់ការចរចារ និងចុះកិច្ចព្រមព្រៀងភាព​ជា​ដៃគូរវាងរដ្ឋ និងឯកជន និងស្វែងរកដៃគូរយុទ្ធសាស្រ្តដែលមានចំណេះជំនាញ និងបទពិសោធន៍លើវិស័យផ្លូវដែក ដើម្បីចូលរួមអភិវឌ្ឍន៍ផ្លូវដែកឱ្យ​មានភាពល្អប្រសើរ និងមានប្រសិទ្ធភាពខ្ពស់ ស្របតាមចក្ខុវិស័យរបស់រាជរដ្ឋា​ភិបាល​កម្ពុជា៕
ដោយ៖មុនី