MC. បរទេស ៖ ប្រធានាធិបតីអាមេរិក លោក ដូណាល់ ត្រាំ បាននិយាយ កាលពីពេលថ្មីៗនេះថា សហរដ្ឋអាមេរិកនឹងបង្កើនការលក់អាវុធ ឲ្យទៅប្រទេសឥណ្ឌា ក្នុងនោះ មានទាំងការលក់យន្តហោះចម្បាំង ទំនើប F-35 ផងដែរ។

ក្នុងពេលធ្វើសន្និសីទសារព័ត៌មាន នៅសេតវិមាន ជាមួយនាយករដ្ឋមន្ត្រីឥណ្ឌា លោកប្រធានាធិបតីអាមេរិក ដូណាល់ ត្រាំ បាននិយាយថា សហរដ្ឋអាមេរិកនឹងលក់យន្តហោះចម្បាំង F-35 ទៅកាន់ប្រទេសឥណ្ឌា ដែលនឹងចូលរួមជាមួយក្លឹប «អភិជន នៃប្រទេសដែលមានយន្តហោះបំបាំងកាយទំនើប ទាន់សម័យ។»

លោក ដូណាល់ ត្រាំ បានប្រាប់ថា «ចាប់ពីឆ្នាំនេះតទៅ យើងនឹងបង្កើនការលក់យោធាទៅឱ្យប្រទេសឥណ្ឌា ជាច្រើនពាន់លានដុល្លារ។ យើងក៏កំពុងត្រួសត្រាយផ្លូវដើម្បីផ្តល់ឱ្យឥណ្ឌា នូវយន្តហោះចម្បាំងបំបាំងកាយ F-35 ទៀតផង»។

នាយករដ្ឋមន្ត្រីឥណ្ឌា លោក Modi បាននិយាយថា លោកចង់ឈានដល់កិច្ចព្រមព្រៀងពាណិជ្ជកម្ម ជាមួយសហរដ្ឋអាមេរិក ក្នុងពេលឆាប់ៗនេះ។ លោក Modi បាននិយាយថា «ដើម្បីធានាបាននូវសន្តិសុខថាមពល របស់ប្រទេសឥណ្ឌា យើងនឹងផ្តោតលើពាណិជ្ជកម្ម ប្រេង និងឧស្ម័ន។ ការវិនិយោគលើហេដ្ឋារចនាសម្ព័ន្ធថាមពល ក៏នឹងកើនឡើងផងដែរ នៅក្នុងវិស័យថាមពលនុយក្លេអ៊ែរ»៕

ប្រភពពី AFP ប្រែសម្រួល៖ សារ៉ាត