កំពង់ធំ៖ក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរ​ខេត្តកំពង់ធំបានដាក់ចេញនូវ​គោលការណ៍​ចំនួន៨ ក្នុងនោះមានការ​បង្កើតផ្សារកសិករ ផ្សារចុងសប្តាហ៍ ផ្សាររាត្រី បណ្ដុំអ្នកផលិត សួនកសិ​ឧស្សាហកម្ម កសិទេស​ចរណ៍ជាដើម ។គោលការណ៍នេះបាន​បញ្ចេញ​ឱ្យដឹងក្នុងសិក្ខាសាលាស្តីពីដំណោះស្រាយហិរញ្ញវត្ថុ ក្នុងវិស័យកសិកម្ម សិប្បកម្ម និងពាណិជ្ជកម្មនាចុងសប្ដាហ៍នេះ។

ក្រោមការសម្រប​សម្រួល​ពីរដ្ឋបាលខេត្តកំពង់ធំ សិក្ខាសាលាស្តីពី​ដំណោះស្រាយហិរញ្ញវត្ថុ ក្នុងវិស័យកសិកម្ម សិប្បកម្ម និងពាណិជ្ជកម្ម​បានប្រារព្ធនៅសាលប្រជុំសាលាខេត្ត ។

សិក្ខាសាលាមានការអញ្ជើញចូលរួមពីឯកឧត្តមបណ្ឌិត សួង ណយ អនុប្រធានគណៈកម្មការជាតិជំរុញចលនាភូមិ១ ផលិត​ផល១ និងជា​ក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរ លោក ជា វ៉ាន់ចាន់  អភិបាលរង​ខេត្ត​កំពង់ធំ សមាជិកភូមិ១ ផលិតផល១​ខេត្តកំពង់ធំ អ្នកកែច្នៃថ្មី អ្នកពាក់ព័ន្ធដំឡូងមី រោងម៉ាស៊ីនកិនស្រូវ ប្រធានសហគមន៍​កសិកម្ម និងសិប្បករជាង១០០នាក់។

ក្នុងសិក្ខាសាលាក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារ​ផលិតផលខ្មែរខេត្តកំពង់ធំបានបង្ហាញឱ្យដឹង នូវការ​ដាក់​គោលការណ៍​ចំនួន៨មាន៖១.បង្កើតផ្សារកសិករ ផ្សារចុងសប្តាហ៍ ផ្សាររាត្រី បណ្ដុំអ្នក​ផលិត សួនកសិ​ឧស្សាហកម្ម កសិទេសចរណ៍។ ២.ដើម្បី​បង្កើតទី១ បានត្រូវមាន ផលិតផលសក្ដានុពល វត្ថុធាតុដើម អភិវឌ្ឍធនធានមនុស្ស អភិវឌ្ឍន៍​ផលិតផល។ ៣.ដើម្បីបានទី២ ត្រូវមានថវិកា ត្រូវជួបស្ថាប័ន​ហិរញ្ញវត្ថុ ដើម្បីដោះស្រាយ ពង្រីកអាជីវកម្ម។ ៤.បានថវិកា ត្រូវខ្ចីគេ ត្រូវចូលហ៊ុនគ្នា ឬត្រូវសុំគេ។ ៥.បើខ្ចីគេ ឬចូលហ៊ុន ត្រូវសងវិញ។ ៦.ដើម្បីសងគេវិញបាន ត្រូវរកប្រាក់​ចំណេញ ដោយផលិតច្រើន ចំណាយតិច បើលក់អត់ដាច់ត្រូវចេះកែច្នៃ វេចខ្ចប់ រកទីផ្សារ។ ៧.ដើម្បី​រកទីផ្សារ សេវាកម្មល្អ ផលិត​ផលមាន សោភ័ណភាព សុវត្ថិភាព និរន្តរភាព សក្ដានុពល តម្លៃសមរម្យ។ ៨.ដើម្បីទទួលបានទី៦ និងទី៧ ត្រួវរួមគ្នាជា សហគមន៍ សហគ្រាស ក្រុមហ៊ុន បណ្ដុំផលិត អភិវឌ្ឍ​ធនធានមនុស្សតាមជំនាញ ដែលមានស្រាប់នៅនឹងកន្លែង។

ឆ្លើយតបនឹងគោលការណ៍ដែលបានដាក់ចេញខាងលើ ឯកឧត្តមបណ្ឌិត សួង ណយ អនុប្រធានគណៈ​កម្មការជាតិ​ជំរុញចលនាភូមិ១ ផលិត​ផល១បានលើកឡើងថា សិក្ខាសាលា​ស្តីពីដំណោះស្រាយហិរញ្ញវត្ថុ​ក្នុងវិស័យកសិកម្ម និង​សិប្បកម្ម​ដោយ បានអញ្ជើញសាខាធនាគារ និងស្ថាប័នហិរញ្ញវត្ថុ​មួយចំនួន មកធ្វើបទបង្ហាញ និងជជែកជាក្រុមដើម្បី​ដោះស្រាយបញ្ហាប្រឈម ទាំងនោះ ដែលផ្តោតលើហិរញ្ញប្បទាន (Loan) ឬ លទ្ធភាពទទួលបានហិរញ្ញវត្ថុ (Access to Finance)មាន៖១. ឥណទានមានរយៈពេលកំណត់( Term Loan (TL)), ២. ឥណទានវិបារូបន៍ (Overdraft (OD)), ៣. ការផ្តល់ប្រាក់កម្ចីឡើងវិញ (Loan Refinance)និង ៤. ការប្តូរលក្ខខណ្ឌឥណទាន( Restructuring Loan) ។

ខេត្តកំពង់ធំអំណោយផលសម្រាប់ដំណាំកសិ-ឧស្សាហកម្ម ស្ថានភាព​នេះបង្ហាញឱ្យឃើញថា ប្រជាពលរដ្ឋភាគ​ច្រើន​មានមុខរបរចម្បង​ក្នុងវិស័យកសិកម្ម។ តាមការបញ្ជាក់របស់លោក ជា វ៉ាន់ចាន់  អភិបាល​រង​​ខេត្តបានឱ្យដឹងថា​សហគ្រាស ឧស្សាហកម្ម និងសិប្បកម្មសរុប ៣.១១៨ មូលដ្ឋានកំពុងដំណើរការមានដើមទុនសរុប​១២៥.៣៥១.​៤៥១ ដុល្លារអាមេរិក និងប្រើកម្លាំងពលកម្មសរុប១១.៣០០នាក់ (ស្រី ៤.៦២២នាក់)។ ខេត្តមានទីតាំងលក់ទំនិញ និងសេវាកម្ម​សរុប ៩.៥០៧ ទីតាំង ដែលភាគច្រើនជាលក្ខណៈគ្រួសារ៕

ដោយ៖​ប៊ុន​រដ្ឋា