(ភ្នំពេញ)៖ លោក អ៊ុក ចន្ថា អនុប្រធានមន្ទីរអប់រំ យុវជន និង​កីឡា​រាជធានីភ្នំពេញបានកោតសរសើរ និងវាយតម្លៃខ្ពស់​ចំ​ពោះ​ការរួមគ្នារបស់ប្រធានសមាគម-ក្លឹបកីឡា គ្រឹះស្ថាន​បឋម​សិក្សាសាធារណៈ និងឯកជននៃរដ្ឋបាលខណ្ឌទាំង១៤ ជំរុញ​ឱ្យ​ការប្រកួតកីឡាសិស្សបឋមសិក្សា ជើងឯករាជធានីភ្នំពេញ​ឱ្យទទួលបានលទ្ធផលល្អប្រសើ។

ក្នុងឱកាសបិទការប្រកួតព្រឹត្តិការណ៍សិស្សបឋមសិក្សា ជើង​ឯករាជធានីភ្នំពេញ ប្រចាំឆ្នាំ២០២៥នេះ លោក អ៊ុក ចន្ថា គូសបញ្ជាក់ថា លទ្ធផលទទួលបានពីការប្រកួតនេះ​មានភាព​ល្អប្រសើរ ទាំងវិន័យ បច្ចេកទេស ដែលសបញ្ជាក់អំពីការខិតខំ​ប្រឹងប្រែង ទាំងកម្លាំងកាយចិត្ត សម្ភារ ថវិការបស់ថ្នាក់​ដឹកនាំ​ក្លឹប គ្រឹះស្ថានបឋមសិក្សាទាំងអស់ ក្នុងរាជធានីភ្នំពេញ ក្នុងការ​ដឹកនាំក្រុមរបស់ខ្លួនចូលរួមប្រកួត ដើម្បីបន្តការអភិវឌ្ឍ​វិស័យ​កីឡាសិស្សបឋមសិក្សាឱ្យកាន់តែរីកចម្រើន។ ជាមួយគ្នានេះ ភាពជោគជ័យនៃព្រឹត្តិការណ៍រយៈពេល ៧ថ្ងៃនេះ ក៏ឆ្លុះបញ្ចាំង​អំពីការខិតខំដឹកនាំប្រកួតបានល្អរបស់គណៈកម្មការរៀបចំការប្រកួត អាជ្ញាកណ្តាល ចៅក្រម ដោយគោរពទៅតាមច្បាប់​នៃ​ការប្រកួតបានត្រឹមត្រូវ។ បន្ថែមពីលើនេះ អនុប្រធានមន្ទីរ​អប់រំ​ក៏បានកោតសរសើរចំពោះ ប្រតិភូ កីឡាករ កីឡាការិនីវ័យ​ក្មេង​ទាំងអស់ ដែលបានប្រកាន់ខ្ជាប់នូវវិន័យ សណ្តាប់ធ្នាប់ គោរពគ្នាទៅវិញទៅមក និងបទបញ្ជាការប្រកួតដែល​សហព័ន្ធ​កីឡាជាតិបានកំណត់។

បន្ថែមពីលើនេះ លោក អ៊ុក ចន្ថា ក៏បានជំរុញលើកទឹកចិត្តដល់​កីឡាករ កីឡាការិនីទាំងអស់ ដែលដណ្តើមបានជ័យលាភី​លើ​ប្រភេទកីឡាទាំង៥នេះ ត្រូវបន្តយកចិត្តទុកដាក់ខិតខំប្រឹង​ប្រែ​ងហ្វឹកហាត់បន្ថែមទៀត ដើម្បីត្រៀមការប្រកួតកីឡា​សិស្ស​បឋម​សិក្សា ថ្នាក់ជាតិប្រចាំឆ្នាំ២០២៥ ដែលគ្រោងធ្វើឡើង​ពីថ្ងៃទី០២-១១ ខែឧសភា ខាងមុខ នៅរាជធានីភ្នំពេញឱ្យ​ទទួល​បានលទ្ធផលល្អ។ ចំពោះកីឡាករ កីឡាការិនីមិន​ដណ្តើ​ម​បានជ័យលាភី ក៏ត្រូវដុសខាត់សមត្ថភាពឱ្យ​កាន់តែរីក​ចម្រើន​ផងដែរ ដើម្បីត្រៀមការប្រកួតនានា នាពេលខាងមុខបន្ត​បន្ទាប់​ទៀត។

គួរបញ្ជាក់ថា ការប្រកួតកីឡាសិស្សបឋមសិក្សា ជើងឯករាជ​ធានី​ភ្នំពេញ ប្រចាំឆ្នាំ២០២៥ មានប្រភេទកីឡា​ចំនួន ៥ រួម​មាន៖ បាល់បោះ, បាល់ទះ, បាល់ទាត់, អត្តពលកម្ម និង​វាយកូនឃ្លីលើតុ ដែលដំណើរការពីថ្ងៃទី៩-១៥ ខែកុម្ភៈ ឆ្នាំ២០២៥ ដោយមានប្រតិភូ គ្រូបង្វឹក កីឡាករ កីឡាការិនី​សរុប ៩៦០នាក់ នារី ២២៣នាក់៕

ដោយ ៖ ជាវ ចន្ធូ