អាកាសយានដ្ឋានអន្តរជាតិភ្នំពេញនឹងធ្វើលំហាត់សមយុទ្ធទ្រង់ទ្រាយធំប្រចាំឆ្នាំនៅព្រឹកថ្ងៃទី២១ កុម្ភៈ
ភ្នំពេញ៖អាកាសយានដ្ឋានអន្តរជាតិភ្នំពេញនឹងធ្វើលំហាត់សមយុទ្ធទ្រង់ទ្រាយធំនៅថ្ងៃទី២១ ខែកុម្ភៈ ឆ្នាំ២០២៥ ចាប់ពីម៉ោង៧ព្រឹក រហូតដល់ ១២ ថ្ងៃត្រង់។នេះបើយោងតាមសេចក្តីជូនដំណឹងរបស់រដ្ឋលេខាធិការដ្ឋានអាកាសចរណ៍ស៊ីវិល។
សេចក្តីជូនដំណឹងស្ដីពីការធ្វើលំហាត់សមយុទ្ធទ្រង់ទ្រាយធំ (AIRPEX-23) ប្រចាំឆ្នាំ២០២៣នៅអាកាសយានដ្ឋានអន្តរជាតិភ្នំពេញនៃរដ្ឋលេខាធិការដ្ឋានអាកាសចរណ៍ស៊ីវិលកាលពីសប្ដាហ៍មុន រដ្ឋលេខាធិការដ្ឋានអាកាសចរណ៍ស៊ីវិល បានជូនដំណឹងដល់ប្រជាពលរដ្ឋរស់នៅក្នុងរាជធានីភ្នំពេញ ជាពិសេសតំបន់ក្បែរអាកាសយានដ្ឋានអន្តរជាតិភ្នំពេញថា ដោយយោងទៅតាមច្បាប់ស្តីពី អាកាសចរណ៍ស៊ីវិល នៃព្រះរាជាណាចក្រកម្ពុជា និងអង្គការអាកាសចរណ៍ស៊ីវិលអន្តរជាតិ (ICAO) រដ្ឋនីមួយៗដែលជាសមាជិក តម្រូវឱ្យធ្វើផែនការគ្រប់គ្រងគ្រោះអាសន្ននៅអាកាសយានដ្ឋានអន្តរជាតិ (Airport Emergency Plan) ហើយត្រូវធ្វើលំហាត់សមយុទ្ធទ្រង់ទ្រាយធំ (Full ScaleAirport_Emergency Exercise) រៀងរាល់ពីរឆ្នាំម្ដង ដើម្បីធានាបាននូវពេលវេលាឆ្លើយតបការទំនាក់ទំនងសាកល្បងសមត្ថភាព និងការទទួលខុសត្រូវរបស់ស្ថាប័ននីមួយៗ។ ដូច្នេះអាកាសយានដ្ឋានអន្តរជាតិភ្នំពេញនឹងធ្វើលំហាត់សមយុទ្ធទ្រង់ទ្រាយធំ នៅថ្ងៃសុក្រថ្ងៃទី២១ ខែកុម្ភៈ ឆ្នាំ២០២៥ ចាប់ពីម៉ោង៧ព្រឹក រហូតដល់១២ ថ្ងៃត្រង់។
លំហាត់សមយុទ្ធនេះនឹងមានដុតប្រេង និងកង់ឡានចាស់ៗ បង្កើតបានជាអណ្តាតភ្លើងសន្ធោសន្ធៅ នៅក្នុងបរិវេណអាកាសយានដ្ឋានអន្តរជាតិភ្នំពេញ ក្នុងនោះផងដែរក៏មានការចល័តរថយន្តអគ្គិភ័យ រថយន្តសង្គ្រោះ ដោយមានការចូលរួមពីអាជ្ញាធរដែនដីសាលារាជធានីភ្នំពេញ កងកម្លាំងប្រដាប់អាវុធ មន្ទីរពេទ្យនានា ក្រុមហ៊ុនសម្បទានអាកាសយានដ្ឋាន SCA/CAMS និងក្រុមហ៊ុនចរាចរណ៍ដែនអាកាស CATS។
ដោយឡែកនៅថ្ងៃទី១៩ ខែកុម្ភៈ ក្រសួងព័ត៌មានបានចេញសេចក្តីជូនដំណឹងទៅដល់សាធារណៈជន ម្ចាស់ប្រព័ន្ធផ្សព្វផ្សាយ អ្នកសារព័ត៌មានជាតិ និងអន្តរជាតិទាំងអស់អំពីព្រឹត្តិការណ៍លំហាត់សមយុទ្ធទ្រង់ទ្រាយធំនេះថា លំហាត់សមយុទ្ធនេះ រៀបចំឡើងដើម្បីជាបទពិសោធន៍ និងចំណេះដឹងដល់ស្ថាប័ន ភ្នាក់ងារពាក់ព័ន្ធនានា លើការងារជួយសង្គ្រោះជនរងគ្រោះនៅពេលមានឧបទ្ទវហេតុគ្រោះថ្នាក់ធ្លាក់យន្តហោះដែលអាចកើតមានជាយថាហេតុ។
ក្រសួងព័ត៌មានបានប្រាប់ដល់ម្ចាស់ប្រព័ន្ធផ្សព្វផ្សាយ និងអ្នកសារព័ត៌មានជាតិ និងអន្តរជាតិទាំងអស់ ដែលមានចំណាប់អារម្មណ៍ចូលរួមយកព័ត៌មានក្នុងកម្មវិធីខាងលើ សូមទំនាក់ទំនងចុះឈ្មោះតាមរយៈទូរសព្ទលេខ៖ ០៩២ ១៦៨ ៦០០ ចាប់ពីថ្ងៃជូនដំណឹង រហូតដល់ថ្ងៃទី២០ ខែកុម្ភៈឆ្នាំ២០២៥៕
ដោយ៖មុនី
