បរទេស ៖ មេដឹកនាំអ៊ុយក្រែន លោក Zelensky បានលើកឡើងថា លោកចង់ជួបប្រធានាធិបតីអាមេរិក មុនពេលមានកិច្ចប្រជុំកំពូល Trump-Putin។

ប្រធានាធិបតី Volodymyr Zelensky បាននិយាយ កាលពីថ្ងៃអាទិត្យថា លោក និងប្រធានាធិបតីអាមេរិក Donald Trump គួរតែជួបពិភាក្សាគ្នា អំពីកិច្ចព្រមព្រៀងដែលផ្តល់សិទ្ធិឱ្យទីក្រុងវ៉ាស៊ីនតោន ទទួលបានធនធានធម្មជាតិអ៊ុយក្រែន មុនពេលកិច្ចប្រជុំណាមួយ រវាងលោក Trump និងមេដឹកនាំរុស្ស៊ីលោក Vladimir Putin ។

លោក Zelensky បាននិយាយ ក្នុងអំឡុងសន្និសីទសារព័ត៌មាន នៅទីក្រុង Kyiv ថា «ដើម្បីធ្វើកិច្ចព្រមព្រៀងស្តីពី កង្វល់សន្តិសុខអ៊ុយក្រែន យើងត្រូវជួប និងពិភាក្សាគ្នាអំពីវា ខ្ញុំគិតថា កិច្ចប្រជុំនេះ គួរតែមានភាពយុត្តិធម៌ ដែលមានន័យថា មុនពេល Trump ជួបជាមួយ លោក ពូទីន»។

គួរបញ្ជាក់ថា ប្រធានាធិបតីអ៊ុយក្រែន លោក Volodymyr Zelensky ចង់បានការធានាសន្តិសុខជាក់ស្តែង ពី លោក Trump ជាថ្នូរនឹងការទទួលបានធនធានសំខាន់ៗ ដូចជា លីចូម ទីតាញ៉ូម អ៊ុយរ៉ាញ៉ូម និង លោហៈកម្រ៕

ប្រភពពី AFP ប្រែសម្រួល៖ សារ៉ាត