បរទេស ៖ អង្គការក្រៅរដ្ឋាភិបាលមួយ បាននិយាយថា នៅទីក្រុង Jacobabad ដ៏ក្តៅបំផុត របស់ប្រទេសប៉ាគីស្ថាន ទឹកស្អាតនិងទឹកចម្រោះ អាចជួយទប់ទល់នឹងការប្រែប្រួលអាកាសធាតុ ប៉ុន្តែ ជំនួយបរទេស ដែលត្រូវបានប្រធានាធិបតីអាមេរិក Donald Trump សម្រេចឲ្យបង្កក បានគំរាមកំហែងការផ្គត់ផ្គង់ ដ៏សំខាន់របស់ខ្លួន។

អង្គការ HANDS របស់ប៉ាគីស្ថាន និយាយថា បុគ្គលិករាប់សិបនាក់ រួមទាំងអ្នកជំនាញ ដែលគ្រប់គ្រង ការចម្រោះទឹក និងសេវាកម្មហេដ្ឋារចនាសម្ព័ន្ធ ត្រូវបានបញ្ជូនមកផ្ទះវិញ នាំឲ្យសេវាកម្មនេះទំនងជានឹងឈប់ដំណើរការ ក្នុងរយៈពេលប៉ុន្មានខែ ខាងមុខ នេះបើយោងតាមនាយកប្រតិបត្តិ អង្គការ HANDS លោក Shaikh Tanveer Ahmed ។

គួរបញ្ជាក់ថា ទីក្រុង Jacobabad របស់ប្រទេសប៉ាគីស្ថាន មួយនេះ ស្ថិតក្នុងខេត្ត Sindh ភាគខាងត្បូង ពេលខ្លះ សីតុណ្ហភាព មានការកើនឡើង លើសពី ៥០ អង្សាសេ អំឡុងកំណើនរលកកំដៅ ដែលបណ្តាលឱ្យមានបញ្ហាសុខភាពធ្ងន់ធ្ងរ ដូចជា ការខះជាតិទឹក និង ជំងឺដាច់សរសៃឈាមខួរក្បាល ជាដើម។

ក្នុងឆ្នាំ២០១២ ទីភ្នាក់ងារ USAID បានសន្យាផ្តល់ជំនួយ ចំនួន៦៦លានដុល្លារ ដើម្បីលើកកំពស់សេវាក្រុង រួមទាំង ការជួសជុលរោងចក្របូមទឹក និង បន្សុទ្ធទឹកពីប្រឡាយចម្ងាយ ២២គីឡូម៉ែត្រ។ ប៉ុន្តែ HANDS ដែលមិនរកប្រាក់ចំណេញ របស់ប៉ាគីស្ថាន មួយនេះ និយាយថា ការបង្កក បានរារាំង ១.៥ លានដុល្លារ ដែលត្រូវបានគ្រោងទុក ដើម្បីធ្វើឱ្យគម្រោងនេះ អាចដំណើរការបាន ក្នុងរយៈពេលវែង ស្រាប់តែ មានហានិភ័យ «ក្នុងរយៈពេល ពីរបីខែ» ។

ពលរដ្ឋ ឈ្មោះ Tufail Ahmed អាយុ២៥ ឆ្នាំ បានប្រាប់ AFP ថា «ប្រសិនបើការផ្គត់ផ្គង់ទឹក ត្រូវបានកាត់ផ្តាច់ វានឹងមានការលំបាកខ្លាំង សម្រាប់យើង..ការរស់រានមានជីវិត នឹងមានការលំបាក ព្រោះ ទឹកគឺជារបស់ចាំបាច់បំផុត សម្រាប់ជីវិត»៕

ប្រភពពី AFP ប្រែសម្រួល៖ សារ៉ាត