សៀមរាប៖ថវិកាចំនួន២៦ ០០០ដុល្លារអាមេរិក ក្នុងនោះថវិកាចំនួន២​ពាន់​ដុល្លារជាការបរិច្ចាគផ្ទាល់របស់លោក យ៉ុង ហ៊ីយុនគីម តំណាងសាកល​វិទ្យាល័យសុខាភិបាល ស្ហូន ជុនហ្យ៉ាងនៃទីក្រុងសេអ៊ូល ព្រមទាំងសម្ភារៈ​សិក្សា​មួយចំនួនទៀតត្រូវ បានប្រគល់ជូនប្រធានមជ្ឈមណ្ឌល​កុមារកំព្រា​ខេត្តសៀមរាបកាលពីថ្ងៃទី២៣ ខែកុម្ភៈ ឆ្នាំ២០២៥ ក្រោមវត្តមាន​លោក​ជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងលោក យុន លីនណេ អភិបាលរងខេត្តតំណាងឯកឧត្តម ប្រាក់ សោភ័ណ អភិបាល​ខេត្តសៀមរាប ព្រមទាំប្រតិភូសប្បុរសជនកូរ៉េ ជាច្រើននាក់ទៀត។

ក្នុងឱកាសនេះលោកជំទាវ ជ្រឹង បុទុមរង្សី បាននាំប្រសាសន៍ផ្តាំផ្ញើសួរ​សុខទុក្ខពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោក​ជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនដល់គណៈគ្រប់គ្រង​និងក្មួយៗកុមារកំព្រាកំពុងស្នាក់ នៅក្នុងមជ្ឈមណ្ឌល។លោកជំទាវបន្តថា ព្រឹត្តិការណ៍សប្បុរសធម៌នាពេលនេះផ្តើមចេញពីទស្សនកិច្ចរបស់​សម្តេចធិបតីហ៊ុន ម៉ាណែត និងលោកជំទាវ ពេជ ចន្ទមុន្នី ក្នុងដំណើរ​បំពេញទស្សនកិច្ចផ្លូវការនៅសាធារណរដ្ឋកូរ៉េកាលពីខែឧសភាឆ្នាំ២០២៣ បានផ្តួចផ្តើមគំនិតកិច្ចសហប្រតិបត្តិការដើម្បីជំរុញបុព្វហេតុសប្បុរសធម៌នេះឡើង។

លោក យុន លីនណេ អភិបាលរងខេត្ត បានថ្លែងអំណរគុណដល់គណៈ​ប្រតិភូសប្បុរសជនជាតិ និងអន្តរជាតិដែលតែងតែមក សួរសុខទុក្ខនិ​ងផ្តល់មូលនិធិឱ្យមជ្ឈមណ្ឌលកុមារកំព្រាខេត្តសៀមរាប។

សូមជម្រាបថាមជ្ឈមណ្ឌលកុមារកំព្រាខេត្តសៀមរាបបង្កើតឡើងនៅឆ្នាំ១៩៧៩មានទីតាំងនៅភូមិវិហារចិន សង្កាត់ស្វាយដង្គំ ក្រុងសៀមរាប។មជ្ឈមណ្ឌលនេះបានប្តូរទីតាំងមកនៅភូមិជ័យ សង្កាត់ទឹកវិល ក្រុងសៀម​រាបនៅខែមីនាឆ្នាំ២០០៩។បច្ចុប្បន្នមានកុមារ​៤៥នាក់​(ស្រី២៤នាក់)និង​មានបុគ្គលិកប្រចាំការចំនួន៧នាក់ហើយប្រភពថវិកាសម្រាប់ទ្រទ្រង់ជាប្រភពថវិការបស់រដ្ឋផ្តល់តាមរយៈរដ្ឋបាលខេត្តសៀមរាប៕
ដោយ៖​ប៊ុន​រដ្ឋា