ទោះបីអ្នកចូលរួមរត់មិនសូវផុសផុលយ៉ាងណាក្តី តែខេត្តព្រះសីហនុ ត្រូវបានចាត់ទុកជាខេត្តគោលដៅសក្កានុពល នៃការរៀបចំរត់ប្រណាំងពាក់កណ្ដាលម៉ារ៉ាតុងអន្តរជាតិនាពេលអនាគត
(ភ្នំពេញ)៖ ព្រឹត្តិការណ៍រត់ពាក់កណ្ដាលម៉ារ៉ាតុង ខេត្តព្រះសីហនុលើកទី១០ បានប្រកាសរៀបចំជាផ្លូវការ នឹងរៀបចំ នៅថ្ងៃអាទិត្យ ទី៣០ ខែមីនា ឆ្នាំ២០២៥ ខណៈការរំពឹងទុកអ្នកចូលរួមរត់នឹងមានចំនួនកើនឡើង។
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា បានគូសបញ្ជាក់ឱ្យដឹងថា ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិ ខេត្តព្រះសីហនុនេះ ការរៀបចំនៅក្នុងឆ្នាំ២០២៥ គឺជាលើកទី១០ហើយ ខណៈការរៀបមិនសូវមានចំនួនអ្នកចូលរួមរត់ច្រើន និងទទួលបានជោគជ័យដូចនៅរាជធានីភ្នំពេញ និងសៀមរាបនោះទេ។ តែទោះបីជាបែបនេះក្តី ការរៀបចំគឺនៅតែបន្ត ព្រោះគោលដៅចង់ផ្សព្វផ្សាយអំសក្កានុពលខេត្តព្រះសីហនុ។
ឯកឧត្តម អគ្គលេខាធិការ បានអះអាងថា ខេត្តព្រះសីហនុ គឺជាខេត្តសក្កានុពល និងអំណោយផលខ្លាំងក្នុងការរៀបចំព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិ បើធៀប និងប្រទេសជិតខាងដែលគេរៀបបានជោគជ័យច្រើន ដូចជាប្រទេសវៀតណាម និងប្រទេសថៃ គឺខេត្តព្រះសីហនុអំណោយផលនិង មានទេសភាពស្រស់ស្អាត នៃតំបន់ឆ្នេរអាចល្អជាងប្រទេសគេផងដែរ។
ឯកឧត្តម បានពន្យល់បន្ថែមទៀតថា ការរៀបចំនៅខេត្តព្រះសីហនុ គឺជាឱកាសផ្តល់នូវការងារធ្វើ និងផ្តល់នូវការជំរុញផ្នែកសេដ្ឋកិច្ច ទេសចរណ៍ ធារៈកិច្ច និងអ្នករកស៊ីទទួលទៀនអាជីវកម្មតូចតាចផងដែរ។
ចាប់ពីឆ្នាំនេះទៅខេត្តព្រះសីហនុ នឹងក្លាយជាខេត្តមានសណ្តាប់ធ្នាប់ សន្តិសុខល្អ និងមានហេដ្ឋានរចនាសម្ព័ន្ធថ្មី ដែលជាការទាក់ជួយឱ្យអ្នកចូលរួមរត់មានកាន់តែច្រើន។ វេទិកាកីឡារត់នៅខេត្តព្រះសីហនុ បានផ្តល់ជូននៅអត្ថប្រយោជន៍ជាខ្លាំងលើការអប់រំ ផ្សព្វផ្សាយអំពីសក្កានុពលរបស់ខេត្ត។
ឯកឧត្តមថា គិតមកត្រឹមថ្ងៃប្រកាសនេះ មានភ្ញៀវជាតិនិងអន្តរជាតិចុះឈ្មោះបានជាង១០០០នាក់ហើយ ខណៈការរំពឹងទុកអាចនិងមានអ្នកចូលរួមរត់ក្នុងព្រឹត្តិការណ៍នេះអាចឈានដល់ជាង២០០០នាក់។
លោក សែម ផល្លា នាយកប្រតិបត្តិម៉ារ៉ាតុង រំពឹងថា ភាពស្រស់ស្អាតនៃឆ្នេរសមុទ្រកម្ពុជានឹងអាចជួយស្រូបទាញបានអ្នកចូលរួមបានច្រើន។ ប្រសិនបើមានការរៀបចំល្អ និងទទួលបានជោគជ័យ ទិវានេះអាចនឹងត្រូវបានពង្រីកទៅជាព្រឹត្តិការណ៍ Full Marathon តែម្ដង។
ចំណែកតំណាងក្រុមហ៊ុន E-Gets លើកឡើងថា មិនត្រឹមតែជំរុញដល់វិស័យកីឡាហាត់ប្រាណដើម្បីសុខភាពប៉ុណ្ណោះទេ ទិវារត់ប្រណាំងអន្តរជាតិពាក់កណ្ដាលម៉ារ៉ាតុងខេត្តព្រះសីហនុក៏លើកស្ទួយទេសចរណ៍ផងដែរ ។ ជាក់ស្ដែងកន្លងមកមានការសរសើរពីទេសចរបរទេសចំពោះភាពស្រស់ស្អាតនៃឆ្នេរសមុទ្រកម្ពុជា។ លោកថា ក្រុមហ៊ុនរបស់លោកនឹងនៅតែបន្តគាំទ្រការរៀបចំនៅឆ្នាំក្រោយៗទៀត។
គួរឱ្យដឹងថា ព្រឹត្តិការណ៍ រត់ប្រណាំងអន្តរជាតិពាក់កណ្ដាលម៉ារ៉ាតុង នៅខេត្តព្រះសីហនុ ឆ្នាំ២០២៥ និងជាលើកទី ១០នេះនឹងប្រព្រឹត្តទៅនៅថ្ងៃអាទិត្យ ទី៣០ ខែមីនា។ សម្រាប់វិញ្ញាសាមាន២១គីឡូម៉ែត្រ ១០គីឡូម៉ែត្រ ៥គីឡូម៉ែត្រ និង ៣គីឡូម៉ែត្រ។ ក្នុងចំណោមអ្នកបានចុះឈ្មោះចូលរួមទាំងអស់ មានជាង២០០នាក់ជាជនជាតិបរទេស ៕
ថត ៖ ជីម ភារ៉ា
អត្ថបទ ៖ ជាវ ចន្ធូ
