សម្ដេចនាយករដ្ឋមន្ត្រី ហ៊ុន ម៉ាណែត ៖ វិស័យអប់រំ គឺត្រូវឈរលើបរិមាណ និងគុណភាព
(ភ្នំពេញ)៖ ក្នុងពិធីបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ លើកទិសដៅសម្រាប់ឆ្នាំសិក្សា ២០២៤-២០២៥ នារសៀលថ្ងៃពុធ ទី២៦ ខែកុម្ភៈ ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា វិស័យអប់រំ គឺត្រូវឈរលើបរិមាណ និងគុណភាព ជាពិសេសសំដៅលើការពង្រឹងគុណភាព ដែលត្រូវបន្តធ្វើ និងត្រូវឈរលើការពង្រឹងការអប់រំថ្នាក់មូលដ្ឋានជាគោលតាមរយៈ៖ ១/ ការពង្រឹងអភិបាលកិច្ច ការគ្រប់គ្រង និងការដឹកនាំមនុស្ស, ២/ កម្មវិធីសិក្សា និងម៉ោងបន្ថែម និង៣/ ការចូលរួមរបស់សហគមន៍ និងអាណាព្យាបាល ។
តាមរយៈអនុសាសន៍អាទិភាពខាងលើ សម្តេចបវរធិបតីនាយករដ្ឋមន្ត្រី បានតម្រង់ទិសអំពីការជ្រើសរើសនាយកសាលា គឺត្រូវប្រគល់សិទ្ធិជូនមន្ទីរអប់រំ យុវជន និងកីឡា ដែលជាអ្នកទទួលជ្រើសរើស ដោយរក្សានូវនិយាម និងស្តង់ដាគុណវឌ្ឍិច្បាស់លាស់បំផុត ដើម្បីធានាដល់គុណភាព និងប្រសិទ្ធភាពនៃការដឹកនាំ ការគ្រប់គ្រងគ្រឹះស្ថានសិក្សាចាប់ពីមូលដ្ឋានឡើងទៅ ដែលជាគ្រឹះដ៏សំខាន់ និយាយរួម គឺចាប់ពីសាលាបឋមសិក្សាតែម្តង។ ជាមួយគ្នានេះ លោកគ្រូអ្នកគ្រូ គឺត្រូវធានាមានទាំងបរិមាណ និងគុណភាពក្នុងការអប់រំ ដោយឈរលើគុណវឌ្ឍិជាអាទិភាពខ្ពស់បំផុត ។
សម្តេចបវរធិបតី បានកំណត់ឱ្យមានការកែសម្រួលរយ:ពេលក្នុងការធ្វើកិច្ចសន្យាគ្រូកិច្ចសន្យាថ្នាក់បឋម ដោយកែសម្រួលពីមួយឆ្នាំម្តង មកពីរឆ្នាំម្តង។ បន្ថែមពីនេះ សម្រាប់លោកគ្រូអ្នកគ្រូបឋមសិក្សាកិច្ចសន្យា ដែលចូលបង្រៀនបានយ៉ាងហោចណាស់ ៤ឆ្នាំឡើងទៅ អាចនឹងរៀបចំបញ្ចូលទៅបណ្តុះបណ្តាលវគ្គជំនាញគរុកោសល្យ ឬបច្ចេកទេស ១៨ខែ ដើម្បីអាចពិនិត្យរៀបចំបញ្ចូលក្របខណ្ឌពេញសិទ្ធិជូនតែម្តង។ មួយវិញទៀត ចំពោះលោកគ្រូអ្នកគ្រូចូលនិវត្តន៍ អាចពិនិត្យបន្តកិច្ចសន្យាដើម្បីបន្តការបង្រៀន តែត្រូវបំពេញកន្លែងដែលខ្វះ ដោយឈរលើកម្លាំងនៃសុខភាព និងឆន្ទៈនៃការចូលរួមរបស់លោកគ្រូអ្នកគ្រូផ្ទាល់។
បន្ថែមពីនេះដែរ សម្តេចនាយករដ្ឋមន្ត្រី បានគូសបញ្ជាក់ថា កម្មវិធីសិក្សា ដោយបន្ថែមម៉ោងរបស់គ្រឹះស្ថានសិក្សា ជាពិសេសថ្នាក់បឋមសិក្សា គឺផ្តោតលើគណិតវិទ្យា, សីលធម៌ និង អក្សរសាស្ត្រ ដែលគប្បីត្រូវរៀបចំ និងជំរុញបន្ថែម ដើម្បីជាឱកាសសម្រាប់សិស្សអាចមានពេលវេលាសិក្សាបានកាន់តែច្រើនជាងមុន និងទទួលបានបំណិនជីវិតកាន់តែល្អប្រសើរ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
