(ភ្នំពេញ)៖ នៅថ្ងៃទី២៧ ខែកុម្ភៈ ឆ្នាំ២០២៥នេះ ក្រសួង​វប្បធម៌ និងវិចិត្រសិល្បៈ បានចេញសេចក្តីជូនដំណឹងមួយ​ដោយ​បញ្ជាក់ថា ៖ បន្ទាប់ពីក្រសួងបានពិនិត្យឃើញ ទំព័រហ្វេសប៊ុកមួយ មានឈ្មោះ ALL from me បានធ្វើការបង្ហោះផ្សព្វផ្សាយបទចម្រៀងក្រោមចំណងជើងថា “ក្តឹងរួយ” មានខ្លឹមសារគ្រោតគ្រាត អសុរោះ គ្មានសីលធម៌ ប៉ះពាល់យ៉ាងខ្លាំងដល់វប្បធម៌ប្រពៃណី ទំនៀមទំលាប់ សេចក្តីថ្លៃថ្នូរសង្គម និងតម្លៃស្រ្តីខ្មែរ។ បើទោះបីជាបទចម្រៀង​ដែលផលិតដោយបច្ចេកវិជ្ជាបញ្ញាសប្បនិម្មិត (AI) នេះ ត្រូវបាន​លុបចេញពីទំព័រហ្វេសប៊ុកមួយ ឈ្មោះ ALL from me ក្តី តែ​បុគ្គលដែលជាអុ្នកគ្រប់គ្រងទំព័រ​ហ្វេសប៊ុក ALL from me ត្រូវ​ធ្វើ​ការទទួលខុសត្រូវចំពោះទង្វើរបស់ខ្លួន។

ជាមួយការចេញសេចក្តីជូនដំនឹងនេះក្រសួងវប្បធម៌ក៏បានអំពាវនាវដល់អាជ្ញាធរមានសមត្ថកិច្ច ឱ្យចាត់វិធានការស្វែងរក​អត្ត​សញ្ញាណ​បុគ្គលរូបនេះ ដើម្បីទទួលខុសត្រូវចំពោះសកម្ម​ភាព​នេះ និងស្នើសុំដល់សាធារណជនដែលប្រើប្រាស់​បណ្តាញ​សង្គម សូមកុំបន្តចែកចាយ និងផ្សព្វផ្សាយបទចម្រៀងនេះ៕

ដោយ៖ម៉ាដេប៉ូ