បរទេស៖ សមាជិកព្រឹទ្ធសភាអាមេរិក បានចោទប្រកាន់ថា លោក Donald Trump ប្រធានាធិបតីសហរដ្ឋអាមេរិកថា កំពុងប្រើកលលិ្បច ដើម្បីច្បាមយកទាំងរ៉ែ របស់ប្រទេសអ៊ុយក្រែនផង និង រ៉ែរបស់រុស្ស៊ី នេះបើយោងតាមការចុះផ្សាយ របស់ទីភ្នាក់ងារ The guardian កាលពីថ្ងៃព្រហស្បតិ៍នេះ។

លោកស្រី Jeanne Shaheen ព្រឹទ្ធសមាជិក កូតាបក្សប្រជាធិបតេយ្យ មកពីរដ្ឋ New Hampshire បាននិយាយ ក្នុងកម្មវិធី Podcast មួយ កាលពីថ្ងៃពុធថា លោក Donald Trump នឹងបន្តធ្វើកិច្ចព្រមព្រៀង បានសិទ្ធិគ្រប់គ្រងរ៉ែ ជាមួយមេដឹកនាំរុស្ស៊ី លោក Putin បន្ទាប់ពីធ្វើរឿងបែបនេះដូចគ្នារួចរាល់ ជាមួយនឹងលោក Volodymyr Zelenskyy មេដឹកនាំអ៊ុយក្រែន នៅថ្ងៃស្អែកនេះ។

លោកស្រីចាត់ទុកថា នេះគឺជាការប្រើកលល្បិចរបស់ លោក Trump ព្រោះបើតាមកិច្ចព្រមព្រៀង ត្រៀមចុះហត្ថលេខា អាមេរិកអាចបានសិទ្ធិ លើរ៉ែអ៊ុយក្រែន ចន្លោះពី ៤០ ទៅ ៥០ភាគរយ នៅលើទឹកដីអ៊ុយក្រែន ដែលដណ្តើមការគ្រប់គ្រងដោយរុស្ស៊ី ដូច្នេះ លោក Trump ត្រូវធ្វើកិច្ចព្រមព្រៀងរ៉ែបែបនេះ ជាមួយរុស្ស៊ីមួយទៀត ដើម្បីបានសិទ្ធិគ្រប់គ្រងធនធានតម្លៃមហាសាលទាំងនេះ ផងដែរ។

លោកស្រី បានអះអាងបែបនេះ ក្រោយពេលលោកស្រី ទើបបានធ្វើទស្សនកិច្ច នៅប្រទេស អ៊ុយក្រែន នាពេល ថ្មីៗនេះ។ ការលើកឡើងរបស់លោកស្រី បានកើតឡើង មុនមួយថ្ងៃ ដែលលោក Zelensky គ្រោងនឹងធ្វើដំណើរ ទៅសហរដ្ឋអាមេរិក ជួបលោក Trump និងត្រៀមចុះហត្ថលេខាលើកិច្ចព្រមព្រៀងរ៉ែកម្ររបស់អ៊ុយក្រែន តម្លៃ៥០០ពាន់លានដុល្លារអាមេរិក ទូទាត់នឹងជំនួយ របស់អាមេរិក ក្នុងសង្គ្រាមជាង៣ឆ្នាំមកនេះ៕

ប្រភពពី the guardian ប្រែសម្រួល៖សារ៉ាត