កំពង់ឆ្នាំង៖មន្ទីរធម្មការ និងសាសនាខេត្តកំពង់ឆ្នាំងកាលពីថ្ងៃទី២៧ ខែកុម្ភៈ ឆ្នាំ២០២៥​បានប្រារព្ធ​ពិធីផ្សព្វផ្សាយ​ខ្លឹមសារ​សង្ឃ​ប្រកាស​អនុសំវច្ឆរ​មហាសន្និបាតមន្ត្រីសង្ឈទូទាំងប្រទេសលើកទី៣២និ​ងធ្វើ​សន្និបាត​បូកសរុបលទ្ធផលការងារ​ឆ្នាំ​២០២៤ លើកទិសដៅការងារ​បន្តប្រចាំឆ្នាំ២០២៥ ក្រោមព្រះធម្មវង្សាធិបតីព្រះទេពមុនី សុខ ថាន ព្រះមេគណ​ខេត្ត​កំពង់ឆ្នាំងព្រះរាជតំណាងសម្តេចព្រះសង្ឃនាយក​គណៈមហានិកាយនៃព្រះរាជាណាចក្រ​កម្ពុជា ឯកឧត្តម ញ៉ែម វ៉ាលី រដ្ឋ
លេខាធិការក្រសួងធម្មការនិងសាសនា តំណាងឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា ព្រះគ្រូរាជ ធម្មនាថ ជីម រន ព្រះគ្រូទទួលបន្ទុកកិច្ចការគណៈសង្ឃគណៈធម្មយុត្តិកនិកាយខេត្តកំពង់ឆ្នាំងនិងមានការចូលរួមពីរ មន្ត្រីរាជការថ្នាក់ដឹកនាំខេត្តកំពង់ឆ្នាំង  ព្រះមន្ត្រី​សង្ឃខេត្ត មន្ត្រីសង្ឃទាំង ៨ ក្រុង ស្រុក ព្រះចៅអធិការ គ្រប់វត្ត អាស្រម ប្រមាណជិតមួយពាន់អង្គនិងនាក់។

ក្នុងឱកាសនេះឯកឧត្តម ញ៉ែម វ៉ាលី បានបញ្ជាក់ថា សាសនាជា​ប្រភព​ផ្ដល់គុណតម្លៃយ៉ាងសំខាន់ ដែលមានឥទ្ធិពល លើរបបនយោ​បាយ ច្បាប់ វប្បធម៌ ប្រពៃណីទំនៀមទម្លាប់ ។ឯកឧត្តមបន្តថា ដើម្បីអនុវត្តគោល​នយោបាយសាសនា ត្រូវគោរពប្រតិបត្តិតាមគោលការណ៍សំខាន់ៗចំនួន​៥គឺទី១.លើកកម្ពស់សាសនា,ទី២.លើកកម្ពស់សីលធម៌សង្គម ,ទី៣.​រក្សាសុខ​ដុមរមនីយកម្មសាសនា ,ទី៤.ពង្រឹងគុណភាពអប់រំពុទ្ធិក​សិក្សា​គ្រប់កម្រិត និងទី៥.អភិវឌ្ឍន៍សមត្ថភាពសង្គម និងធនធានមនុស្ស។

សូមជម្រាបថា ការផ្សព្វផ្សាយខ្លឹមសារសង្ឃប្រកាសអនុសំវច្ឆរ​មហា​សន្និបាត​មន្ត្រីសង្ឈទូទាំងប្រទេសលើកទី៣២ នៅ​​ខេត្តកំពង់ឆ្នាំង​ក្នុង​គោលបំណង ណែនាំអំពីការប្រតិបត្តិធម៌វិន័យ, ការគ្រប់គ្រងអប់រំព្រះ​សង្ឃក្នុងវត្ត អារាម, ការប្រើប្រាស់​ប្រព័ន្ធ ទំនាក់ទំនងសង្គមឌីជីថលនិង​ការពង្រឹងតួនាទីភារកិច្ចរបស់ ព្រះមន្ត្រីសង្ឃ ខេត្ត ក្រុង ស្រុកនិងវត្ត​ដើម្បីឱ្យមាននូវ​អ​ភិសមាចារ គួរជាទីគោរពសក្ការៈ ៕ 
ដោយ៖  សុខ  គឹមសៀន