រដ្ឋបាលខេត្តបាត់ដំបង កែលម្អកំណាត់ផ្លូវខេត្តលេខ១៥៧១ពីក្រុងបាត់ដំបង ទៅស្រុកបាណន់
បាត់ដំបង៖មន្ទីរសាធារណការនិងដឹកជញ្ជូន ខេត្តបាត់ដំបង កាលពីថ្ងៃទី២៨ ខែកុម្ភៈ ឆ្នាំ២០២៥ បានបើកការដ្ឋានជួសជុលកែលម្អ និងបន្តពង្រីកតួផ្លូវបន្ថែមលើកំណាត់ផ្លូវខេត្តលេខ ១៥៧១ ពីក្រុងបាត់ដំបង ឆ្ពោះទៅស្រុកបាណន់ដែលមានប្រវែងជាង៤គីឡូម៉ែត្រ។ការដ្ឋាននេះជាជំហានបន្តលើកទី២ តពីគម្រោងឆ្នាំ២០២៤។
ពិធីបើកការដ្ឋានកែលម្អ និងពង្រីកកំណាត់ផ្លូវខេត្តលេខ១៥៧១ ដែលប្រារព្ធនៅសង្កាត់វត្តគរ ឯកឧត្តម សុខ លូ អភិបាលខេត្តបាត់ដំបង ជាមួយការអបអរសាទរចំពោះការកសាងសមិទ្ធផលថ្មីបន្ថែម ឯកឧត្តមក៏បានរំលឹកដល់អភិបាលក្រុង ស្រុក ឃុំ សង្កាត់ ពាក់ព័ន្ធនៅទីនោះ ថាក្រោយពីការដ្ឋានបញ្ចប់ ត្រូវរៀបចំដាំដើមឈើនៅតាមសងខាងផ្លូវឡើងវិញ និងនៅតាមមុខផ្ទះដើម្បីលើកកម្ពស់សោភណភាពតាមដងផ្លូវ និងគេហដ្ឋាននីមួយៗ ។
ឯកឧត្តមអភិបាលខេត្តក៏បានបន្តដាក់ចេញនូវវិធានការម៉ឺងម៉ាត់ ដោយណែនាំដល់អាជ្ញាធរគ្រប់ថ្នាក់ ក្នុងដែនសមត្ថកិច្ច របស់ខ្លួន ត្រូវតែចាត់វិធានការរឹតបន្តឹងលើការគ្រប់គ្រងចំណីផ្លូវ។ ទប់ស្កាត់ការរំលោភដីចំណីផ្លូវ ។
ចំណែកឯកឧត្តម ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានឱ្យដឹងថា ការដ្ឋានជួសជុលកំណាត់ផ្លូវខេត្តលេខ១៥៧១ ជាជំហានបន្តលើកទី២ សម្រាប់ឆ្នាំ២០២៥។ការងារមាន ការកាយបកដីគ្មានគុណភាពនៅលើតួថ្នល់ និងពង្រីកសងខាងប្រវែងបួនគីឡូម៉ែត្រ លើកំណាត់តួថ្នល់ចាស់ចំនួនពីរកន្លែងប្រវែង១, ៥គីឡូម៉ែត្រនិងការងារដាក់ប្រព័ន្ធលូមូល ,ការពង្រីកលូប្រអប់កាត់ទទឹងផ្លូវមួយកន្លែង ព្រមទាំងរៀបចំដាំបង្គោលនាំផ្លូវ ,ផ្លាកសញ្ញាចរាចរណ៍ និងគូសគំនូសចរាចរណ៍ ជាដើម។
បន្ទាប់ពីការងាររួចរាល់កំណាត់ផ្លូវនេះ ពិតជាមានសារសំខាន់ ឆ្លើយតបទៅនឹងសំណូមពររបស់ប្រជាពលរដ្ឋក្នុងធ្វើចរាចរផ្សេងៗ ,បម្រើដល់វិស័យទេសចរណ៍ វិស័យសេដ្ឋកិច្ចក្នុងតំបន់និងសង្គមជាតិទាំងមូល។
ក្នុងឱកាសនេះលោកប្រធានមន្ទីរ បានសំណូមពរដល់ប្រជាពលរដ្ឋដែលរស់នៅតាមដងផ្លូវសូមចូលរួមរុះរើរបង កាប់រុក្ខជាតិ តាមមុខផ្ទះ ពិសេសរោងតាមចិញ្ចើមផ្លូវ ដែលប៉ះពាល់ដល់គម្រោងកែលំអផ្លូវនេះ៕
អត្ថបទ-រូបភាព៖អ៊ុក សំអាន បប.
