បរទេស៖ ប្រធានាធិបតីនៃប្រទេសអ៊ុយក្រែន លោក Volodymyr Zelenskyy បានប្រាប់ BBC ថា លោកនៅតែមានឆន្ទៈ ចង់ប្រគល់រ៉ែកម្រឲ្យ ទៅសហរដ្ឋអាមេរិក ទាល់តែបានសម្រេច ក្រោយការប៉ុនប៉ង លើកទី១ បានបរាជ័យ បន្ទាប់ពីឈ្លោះប្រកែកគ្នាខ្លាំងៗ ជាមួយប្រធានាធិបតីអាមេរិក លោក Donald Trump ។

យោងតាមការចេញផ្សាយ របស់ទីភ្នាក់ងារព័ត៌មាន CNA លោក Zelensky បានឆ្លើយតបនឹងសំណួរ របស់អ្នកសារព័ត៌មាន BBC កាលពីថ្ងៃអាទិត្យថា លោកនៅតែត្រៀមខ្លួនជានិច្ច ក្នុងការចុះហត្ថលេខា លើកិច្ចព្រមព្រៀងនេះ ប៉ុន្តែ លោកគ្រាន់តែចង់ឲ្យតួនាទីរបស់អ៊ុយក្រែនត្រូវបានទទួលស្គាល់ ហើយឲ្យដៃគូសម្ព័ន្ធមិត្តទាំងអស់ ត្រូវតែច្បាស់ថា ភាគីណាមួយជាបង្កសង្គ្រាម មុន។

ការលើកឡើង របស់ លោក Zelensky ក៏បានកើតឡើង ស្របពេលដែល រដ្ឋមន្ត្រីរតនាគារអាមេរិក លោក Scott Bessent បានប្រាប់ CBS News ដែលជាដៃគូរបស់ BBC ដែរថា ច្បាស់ណាស់ កិច្ចព្រមព្រៀងពាណិជ្ជកម្មរ៉ែនេះ ត្រូវតែដើរទន្ទឹមគ្នានឹងកិច្ចព្រមព្រៀងសន្តិភាព។ លោកបានចោទ លោក Zelensky បានច្រានចោលរបៀបចរចា ផ្សាភ្ជាប់រវាងកិច្ចព្រមព្រៀងរ៉ែនិងសន្តិភាព។ យ៉ាងណាមិញ លោកថា ភាគីទាំងពីរគួរតែប្តូរពីការជជែកគ្នា ជាសាធារណៈ មកជាការជជែកលក្ខណៈឯកជនវិញ បើមានឱកាស ជាលើកទី២។

ប៉ុន្តែ បន្ទាប់ពីកិច្ចប្រជុំកំពូល នៃមេដឹកនាំអឺរ៉ុបនៅអង់គ្លេស កាលពីថ្ងៃអាទិត្យ លោក Zelensky បាននិយាយថា ជំនួប នៅទីក្រុងវ៉ាស៊ីនតោន ថ្មីៗនេះ មិនផ្តល់ផលប្រយោជន៍ដល់សហរដ្ឋអាមេរិក ឬ អ៊ុយក្រែន ដែលជាដៃគូនោះទេ តែពិតជាផ្តល់ផលប្រយោជន៍ ដល់ប្រធានាធិបតីរុស្ស៊ី លោក Vladimir Putin។ ទោះជាយ៉ាងណា លោក Zelensky បាននិយាយថា លោកនឹងត្រឡប់ ទៅសេតវិមានជាថ្មីម្តងទៀត ប្រសិនបើមានការអញ្ជើញ ណាមួយ៕

ប្រភពពី CNA ប្រែសម្រួល៖ សារ៉ាត