សិក្ខាសាលាផ្សព្វផ្សាយស្តីពីនីតិវិធីនៃការទទួល និងដោះស្រាយបណ្ដឹងធានារ៉ាប់រងនៅខេត្តកំពង់ធំ
កំពង់ធំ៖សិក្ខាសាលាផ្សព្វផ្សាយស្តីពីនីតិវិធីនៃការទទួល និងដោះស្រាយ បណ្ដឹងធានារ៉ាប់រង ដែលរៀបចំឡើងដោយរដ្ឋបាលខេត្តកំពង់ធំ បានប្រព្រឹត្តទៅនៅសណ្ឋាគារគ្លរៀស ហូថែល និងស្ប៉ាខេត្តកំពង់ធំ កាលពីរសៀលថ្ងៃទី០៦ ខែមីនា ឆ្នាំ២០២៥។
ពិធីនេះមានការអញ្ជើញពីលោក វ៉ា វិជ្ជា ប្រធាននាយកដ្ឋានគ្រប់គ្រងអាជ្ញាបណ្ណ និងកិច្ចការគតិយុត្តនៃនិយ័តករធានារ៉ាប់រងកម្ពុជា(ន.ធ.ក)តំណាងឯកឧត្តម ប៊ូ ច័ន្ទនីរូ អគ្គនាយកនៃ ន.ធ.ក លោក ស ប៉ាហូ នាយករងរដ្ឋបាលសាលាខេត្ត លោក ហុក ហៀង តំណាងប្រធានមន្ទីរអប់រំ យុវជន និងកីឡាខេត្ត សិស្សានុសិស្ស និស្សិត និងសាធារណជន សមាជិកសមាជិកា ។
លោក វ៉ា វិជ្ជា បានបញ្ជាក់ថា ការរៀបចំសិក្ខាសាលាផ្សព្វផ្សាយស្តីពីនីតិវិធីនៃការទទួល និងដោះស្រាយបណ្ដឹងជានារ៉ាប់រង ក្នុងគោលបំណងបញ្ជ្រាបការយល់ដឹងបន្ថែមជូនដល់សាធារណជន អំពីសារប្រយោជន៍ការធានារ៉ាប់រង សញ្ញាណទូទៅនៃការធានារ៉ាប់រង ប្រភេទនៃបណ្តឹងធានារ៉ាប់រងនីតិវិធីនៃការដាក់ពាក្យបណ្ដឹងធានារ៉ាប់រង និងយន្តការនៃការដោះស្រាយបណ្ដឹងធានារ៉ាប់រង ក្នុងគោលដៅលើកកម្ពស់ កិច្ចការពារអ្នកប្រើប្រាស់សេវាធានារ៉ាប់រង។
ថ្លែងក្នុងកម្មវិធីនេះលោក ស ប៉ាហូ បានលើកឡើងថា ការយល់ដឹងលើការធានារ៉ាប់រង និងសិទ្ធិរបស់ប្រជាពលរដ្ឋក្នុងការដាក់ពាក្យបណ្ដឹងធានារ៉ាប់រង មកនិយ័តករធានារ៉ាប់រងកម្ពុជា ក្នុងប្រទេសកម្ពុជានៅមានលក្ខណៈចង្អៀតនៅឡើយ ហេតុនេះ ចម្បងមួយរបស់និយ័តករធានារ៉ាប់រង បេសកកម្ម គឺផ្សព្វផ្សាយ និងអប់រំសាធារណជនអំពីសារប្រយោជន៍ នៃ ការធានារ៉ាប់រង និងកិច្ចការពារអតិថិជនធានារ៉ាប់រងដែលមានកំណត់ជាក់លាក់ក្នុងក្របខ័ណ្ឌ យុទ្ធសាស្ត្រអភិវឌ្ឍវិស័យធានារ៉ាប់រងកម្ពុជា របស់និយ័តករធានារ៉ាប់រងកម្ពុជា។
លោកនាយករងរដ្ឋបាលសាលាខេត្តកំពង់ធំ បានបន្ថែមទៀតថា ក្នុងគោលដៅបង្កើនការយល់ដឹងបន្ថែមជូនដល់មន្ត្រីរាជការ និងសាធារណជនអំពីប្រភេទនៃបណ្ដឹងធានារ៉ាប់រង នីតិវិធីនៃការដាក់ពាក្យបណ្តឹង និងតួនាទីរបស់និយ័តករក្នុងការដោះស្រាយបណ្តឹងធានារ៉ាប់រង ទើបមានការរៀបចំសិក្ខាសាលានេះឡើង៕
ដោយ៖ប៊ុន រដ្ឋា
