ឧត្តរមានជ័យ៖នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ បានអញ្ជើញចុះសួរសុខទុក្ខ​កងទ័ពជួរ​មុខនៅប្រាសាទតាមាន់ធំ ជិតព្រំដែនកម្ពុជា-ថៃ ។វត្តមានកាល​ពីថ្ងៃទី៦ ខែមីនា ឆ្នាំ២០២៥ ក៏បាននាំយក​អំណោយទៅជូននាយ​ទាហាន នាយទាហានរង និងពលទាហាន នៅមុនពិធីបុណ្យចូលឆ្នាំថ្មី ប្រពៃណីជាតិ​ខ្មែរនឹងឈាន​ចូលមកដល់នៅខែមេសា ខាងមុខ។

ពិធីសំណេះសំណាលដែលបានរៀបចំនៅបញ្ជាការវរសេនាតូចលេខ៤២២ ចំណុះកងពលតូចថ្មើជើងលេខ៤២ នៅទិស​យោធភូមិភាគទី៤» និង​យោធភូមិភាគទី៥ នៅភូមិតាមាន់សែនជ័យ ឃុំគោកមន ស្រុក​បន្ទាយ​អំពិល ខេត្តឧត្តរមានជ័យ នាយឧត្តមសេនីយ៍ ទៀ សីហា បាននាំ​ប្រសាសន៍​ផ្តាំផ្ញើសាកសួរសុខទុក្ខដោយក្តីនឹករលឹកពីសម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និង​លោកជំទាវបណ្ឌិតដែលជានិច្ចជាកាលតែងបានគិតគូរយកចិត្តទុកដាក់ជាប្រចាំ និងគ្រប់កាលៈទេសៈពីសុខទុក្ខ និងជីវភាពរបស់កងទ័ព និងក្រុម​គ្រួសារ​កងទ័ព ទាំងនៅជួរមុខ និងនៅជួរក្រោយ។

នាយឧត្តមសេនីយ៍ ទៀ សីហា បានថ្លែងកោតសរសើរ និងវាយ​តម្លៃ​ខ្ពស់ចំពោះនាយទាហាន នាយទាហានរង និងពល​ទាហានទាំងអស់ ដែលបានលះបង់គ្រប់បែបយ៉ាង ដើម្បីការពារជាតិ សាសនា ព្រះមហាក្សត្រ ការពារបូរណភាពទឹកដី។

នៅទីនោះនាយឧត្តមសេនីយ៍ ទៀ សីហា ក៏បានឆ្លៀតឱកាស​ចូល​ទៅគោរពបារមីនាទីសក្ការៈដ៏ស័ក្ដិសិទ្ធិ នៅលើប្រាសាទ​តាមាន់ធំ​ផងដែរ៕
ដោយ៖ឡុង សំបូរ