ឯកឧត្តម វ៉ាត់ ចំរើន ជួបជាមួយគ្រូឧទ្ទេសវិទ្យាស្ថានជាតិអប់រំកាយនិងកីឡា ដើម្បីពង្រឹងយន្តការប្រសិទ្ធភាពការងារ
(ភ្នំពេញ)៖ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំយុវជននិងកីឡា នាល្ងាចថ្ងៃទី១០ ខែ មីនា ឆ្នាំ២០២៥ បានជួបសំណេះសំណាលជាមួយលោកគ្រូអ្នកគ្រូឧទ្ទេសនៃវិទ្យាស្ថានជាតិអប់រំកាយនិងកីឡា ដើម្បីពិនិត្យពង្រឹងយន្តការងារឆ្ពោះទៅរកប្រសិទ្ធភាពលទ្ធផលឆ្នាំ២០២៥។
ឯកឧត្តម រដ្ឋលេខាធិការក្រសួងអប់រំយុវជននិងកីឡា បានពន្យល់ថា នេះជាការជួបជុំមួយដើម្បីពិនិត្យទៅលើយន្តការងារ និងការរំពឹងទុកសម្រាប់លទ្ធផលការងារឆ្នាំ២០២៥ ហើយក៏ជាឆ្នាំដែលក្រសួងត្រូវពង្រឹងបន្ថែមទៀតលើការងារគ្រប់គ្រងដឹកនាំលើការធ្វើអភិបាលកិច្ចល្អក្នុងការដឹកនាំគ្រប់អង្គភាពស្ថាប័នទាំងអស់ស្ថិតក្រោមចំណុះរបស់ក្រសួងអប់រំយុវជននិងកីឡា ដើម្បីជំរុញការអភិវឌ្ឍន៍អង្គភាព និងស្ថាប័នក្រោមចំណុះទាំងអស់នោះ ឈានឆ្ពោះទៅរកការសម្រេចបានចក្ខុវិស័យឆ្នាំ២០៥០យុទ្ធសាស្រ្តបញ្ចកោណរបស់រាជរដ្ឋភិបាលក្នុងដំណាក់កាលទី១។
ឯកឧត្តម រដ្ឋលេខាធិការ បានរំលេចទៀតថា ការជួបជុំនាពេលនេះ យើងបានពិនិត្យមើលនូវផែនការសកម្មភាពនិង និតិវិធីការងារទាំងអស់របស់វិទ្យាស្ថានជាតិអប់រំកាយនិងកីឡាដែលកំពុងដំណើរការយ៉ាងល្អប្រសើរ ដើម្បីយើងបន្ថែមការកែសម្រួលឱ្យកាន់តែមានគុណតម្លៃនិងប្រសិទ្ធភាពការងារកាន់តែខ្ពស់ ដោយមានការពង្រីកខ្លួនទៅមជ្ឈដ្ឋានខាងក្រៅកាន់តែមានឥទ្ធិពល មានការទទួលស្គាល់កាន់តែទូលំទូលាយ។
ឯកឧត្តម បន្ថែមទៀតថា ក្នុងឆ្នាំ២០២៥នេះដែរ អង្គភាពពាក់ព័ន្ធនឹងរៀបចំសិក្ខាសាលាមួយដើម្បីជជែកដេញដោលស្វែងរកវឌ្ឍនភាពនៃវិស័យកីឡាឱ្យមានមូលដ្ឋានគ្រឹះរឹងមាំ ព្រោះមានកិច្ចការច្រើនដែលត្រូវរៀនសូត្រ និងពង្រឹងឡើងវិញ។ ឯកឧត្ដម វ៉ាត់ ចំរើន រំពឹងថា អ្នកកំពុងសិក្សានៅទីនេះនឹងក្លាយទៅជាធនធានដ៏ល្អដើម្បីចូលរួមបម្រើការងារនៅតាមគ្រឹះស្ថានសិក្សានានា។ ដូច្នេះអ្វីដែលត្រូវបានយកចិត្តទុកដាក់ជាងគេគឺលើប្រសិទ្ធភាពគ្រប់គ្រងដឹកនាំ ការជំរុញទឹកចិត្ត ការសិក្សាស្រាវជ្រាវ ការរៀន និងបង្រៀន។ឯកឧត្ដមទទូចដែរថា នៅវិទ្យាស្ថានជាតិអប់រំកាយ និងកីឡា មិនមែនផ្ដោតតែលើការរៀន និងបង្រៀននោះប៉ុណ្ណោះទេ គឺលើការបង្ហាត់ និងហាត់ផងដែរ។ ហេតុដូចនេះ អ្វីដែលជំរុញឱ្យមានការរីកចម្រើននៅទីនេះបាន គឺត្រូវមានអភិបាលកិច្ចល្អ និងសាមគ្គីភាពផ្ទៃក្នុងល្អ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
