រដ្ឋមន្រ្តីក្រសួងបរិស្ថាន៖ មានក្រុមហ៊ុនចំនួន ៧លួចបង្ហូរទឹកកខ្វក់ចូលក្នុងប្រភពទឹកស្អាត និង មានក្រុមហ៊ុនមួយកំពុងទទួលរងបណ្តឹងនៅតុលាការ
(ភ្នំពេញ)៖ គិតរហូតមកទល់ពេលនេះមានក្រុមហ៊ុនចំនួន ៧ហើយ ដែលក្រសួងបានរកឃើញថា គាត់លួចបង្ហូរទឹកកខ្វក់មានសារជាតិពុល ចូលទៅក្នុងទឹកស្អាតរបស់យើង។ ក្រុមហ៊ុនទាំង៧នេះ ក្រសួងបានចាត់វិធានការតាមផ្លូវច្បាប់ហើយ និងក្នុងនេះក៏មានក្រុមហ៊ុន ១នៅក្រុងព្រះសីហនុ ក៏ត្រូវបានបញ្ជូនទៅតុលាការដែរ ដែលបច្ចុប្បន្ននេះកំពុងដំណើរការក្នុងតុលាការក្រមបរិស្ថានរបស់យើង។
នេះជាការថ្លែងបញ្ជាក់ពីសំណាក់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ប្រាប់បណ្តាញសារព័ត៌មាននារសៀលថ្ងៃទី១១ ខែមីនា ឆ្នាំ២០២៥ ក្រោយបញ្ចប់ កិច្ចប្រជុំលើកទី២គណៈកម្មការអន្តរក្រសួងក្នុងការសម្របសម្រួលអនុវត្តគម្រោងស្តីពីការពង្រឹងសមត្ថភាពលើការគ្រប់គ្រងការបំពុលទឹក នាសណ្ឋានគារកាំបូឌីយ៉ាណា ក្នុងរាជធានីភ្នំពេញ ។
ឯកឧត្តមបណ្ឌិត អ៊ាង សុផល្លែត បានឱ្យដឹងថា៖”នៅក្នុងប្រទេសកម្ពុជា មានរោងចក្រជាង ១០០រោងចក្រដែលសុទ្ធសឹងរោងចក្រដែលមានលទ្ធភាពបង្ហូរសារធាតុពុលឬក៏មិនធ្វើអាងប្រព្រឹត្តកម្មទេ ទឹកដែលបង្ហូរចេញនាំមកក្នុងការបំពុលបរិស្ថានជាពិសេសប្រភពទឹកស្អាតរបស់យើង ប៉ុន្តែរហូតមកទល់ពេលនេះមិនមែនក្រុមហ៊ុនទាំងអស់នេះមិនល្អទេ គឺមានក្រុមហ៊ុនល្អច្រើនវិនិយោគប្រកបទៅដោយការយកចិត្តទុកដាក់ និង ការគោរពវិស័យបរិស្ថាន”។
ឯកឧត្តម រដ្ឋមន្រ្តី បានលើកឡើងដែរថា៖” មានក្រុមហ៊ុនចំនួន ៣ទៀតបានដឹងខ្លួនមកសុំទោស ។ ក្រុមហ៊ុនទាំង ៣នោះបានធ្វើការសុំទោស ហើយគាត់ក៏បានធ្វើការកែតម្រូវ សុំធ្វើការបង់ផាកពិន័យទៅវិញដែរ។ ឥឡូវមានក្រុមហ៊ុនចំនួន៤ ក្នុងដៃរបស់យើងដែលកំពុងតែអនុវត្តផ្លូវច្បាប់ ដែលគាត់មិនទាន់អនុវត្តបានត្រឹមត្រូវ ។ ក្រៅពីនេះក៏មានក្រុមហ៊ុនមួយទៀតគាត់បានតវ៉ាគឺក្នុងព្រែកមួយនោះគាត់បំពុលទឹក គឺយប់ឡើងមានក្លិនស្អុយធ្វើឱ្យប្រជាជនមិនអាចរស់នៅបានរយ:៣ឆ្នាំកន្លងមកហើយ។ ក្រសួងបានរកឃើញ ពេលដែលមន្ត្រីបរិស្ថានចាប់គាត់ឡើងមកជួប គាត់តវ៉ាបដិសេធថា គាត់មិនបានបង្ហូរទឹកស្អុយចូលក្នុងព្រែកទេ។ ក្រសួងបរិស្ថានចុះទៅពិនិត្យយកសំណាកទឹកពិនិត្យដើម្បីអនុវត្តតាមផ្លូវច្បាប់ហើយដែរ។
ជាមួយគ្នា ឯកឧត្តមរដ្ឋមន្រ្តី អំពាវនាវឱ្យក្រុមហ៊ុនទាំងអស់គោរពច្បាប់ ដើម្បីប្រយោជន៍ប្រជាជនយើងទេ បើយើងមិនគោរពច្បាប់ទេមិនអាចមានបរិស្ថានល្អទេ។
ដោយឡែក លោកស្រី MIURA Yoshiko តំណាងជាន់ខ្ពស់ការិយាល័យនៃទីភ្នាក់ងារសហប្រតិបត្តិការអន្តរជាតិជប៉ុន (JICA) បានថ្លែងឱ្យដឹងថា គម្រោងពីការពង្រឹងសមត្ថភាពលើការគ្រប់គ្រងការបំពុលទឹកគឺជាគំនិតផ្តួចផ្តើមរយៈពេល ៣ ឆ្នាំ ដែលបានចាប់ផ្តើមឡើងនៅក្នុងខែកក្កដា ឆ្នាំ២០២៣ ហើយគ្រោងនឹងបញ្ចប់នៅខែកក្កដា ឆ្នាំ២០២៦។ គម្រោងនេះមានគោលបំណងផ្តោតទៅលើការ បង្កើតប្រព័ន្ធតាមដាន និងគ្រប់គ្រងទឹកលើផ្ទៃដី និងទឹកកខ្វក់ ដោយផ្អែកលើអនុក្រឹត្យស្តីពីការ គ្រប់គ្រងការបំពុលទឹក។
លោកស្រីថ្លែងបញ្ជាក់ថា ក្នុងរយៈពេលមួយឆ្នាំកន្លងមកនេះ យើងសម្រេចបាននូវ វឌ្ឍនភាពគួរឱ្យកត់សម្គាល់ក្នុងការអភិវឌ្ឍសមត្ថភាពរបស់មន្ទីរពិសោធន៍ ការត្រួតពិនិត្យគុណភាព ទឹកលើផ្ទៃដី និងការគ្រប់គ្រងទឹកកខ្វក់។ ព័ត៌មានលម្អិតអំពីសមិទ្ធិផលកាលពីឆ្នាំមុននេះ នឹងមាន បង្ហាញជូននៅក្នុងវគ្គបន្តបន្ទាប់៕
ដោយ ៖ ម៉ាដេប៉ូ
