ភ្នំពេញ៖ដោយផ្តើមដំបូងនូវប្រសាសន៍ថា ប្រទេសគុយបា និង​ប្រទេស​កម្ពុជាស្ថិតនៅឆ្ងាយពីគ្នាណាស់ តែយើងនៅជិតគ្នាតាមរយៈ​​​បេះដូង លោកជំទាវ មីឡេនណា ការីដាដ ស្សាលឌីវ៉ារ ពាដ្រា (Milena Caridad Zaldivar Piedra) ឯកអគ្គរដ្ឋទូតវិសាមញ្ញ និងពេញ​សមត្ថភាព​នៃសាធារណរដ្ឋគុយបាប្រចាំកម្ពុជា បានបង្ហាញពីបំណង​នៃការចុះអនុស្សរណៈយោគយល់គ្នាជាមួយ AMS Apsara លើកិច្ច​សហការ​ក្នុងវិស័យព័ត៌មាន ក្នុងន័យចែករំលែកព័ត៌មានទៅវិញទៅម​ក​ជូន​ដល់ប្រជាជននៃប្រទេសទាំងពីរ ។

នៅព្រឹកថ្ងៃទី១២ ខែមីនា ឆ្នាំ២០២៥ លោកជំទាវ មីឡេនណា ការីដាដ ស្សាលឌីវ៉ារ ពាដ្រា ឯកអគ្គរដ្ឋទូតគុយបា​ប្រចាំ​កម្ពុជា​បានអញ្ជើញមកបំពេញ​ទស្សនកិច្ចនៅទីស្នាក់ការក្រុមហ៊ុន អប្សារា មេឌាសឺវីស (AMS) ។លោកជំទាវត្រូវ​បានទទួល​ការស្វាគមន៍យ៉ាង​កក់ក្តៅពីសំណាក់​លោក លឹម ឃុនស្រ៊ុន អគ្គនាយក​ក្រុមហ៊ុនអប្សរា​ព័ត៌មាន និងថ្នាក់ដឹកនាំក្រុមហ៊ុន។

តាមរយៈនៃកិច្ចសន្ទនាលោកជំទាវឯកអគ្គរដ្ឋទូតបានលើកឡើងអំពី​ប្រវត្តិសាស្រ្តនៃទំនាក់ទំនងការទូតរវាងប្រទេស​ទាំងពីរ​ដែល​ឈាន​មកដល់ខួបទី៦៥ នៅឆ្នាំនេះ។ ជាមួយនឹងការកត់សម្គាល់អំពីសក្តានុពលរបស់ AMS Apsara ដែលបំពេញ​តួនាទី ក្នុងការផ្សព្វផ្សាយដ៏សម្បូរបែប លោកជំទាវឯក​អគ្គរដ្ឋ​ទូត​​គុយបាបានបញ្ជាក់ជូនលោក លឹម ឃុនស្រ៊ុន អគ្គនាយក​ក្រុមហ៊ុនអប្សរាព័ត៌មាន នូវបំណងពង្រឹងពង្រីកកិច្ចសហការ​លើ​វិស័យព័ត៌មាន សេដ្ឋកិច្ច វប្បធម៌ អប់រំ ជាដើម ដែលលោក​ជំទាវ​​យល់ថា មានសារសំខាន់ក្នុងការពូនជ្រុំទំនាក់ទំនងរវាងប្រទេសទាំងពីរ គុយបា កម្ពុជា ។លោកជំទាវបានសម្លឹងទៅរក​កិច្ចសហការជាមួយ AMS Apsara ដែលរឹងមាំលើសពីកម្រិតធម្មតា ដែលអាចនឹង​ឈាន​ទៅដល់ការចុះអនុស្សរណៈ​យោគយល់គ្នាមួយ រវាងស្ថានទូតគុយបា​ប្រចាំកម្ពុជា ជាមួយ AMS Apsara ។

ឆ្លើយតបនឹងបំណងរបស់លោកជំទាវឯកអគ្គរដ្ឋទូត លោក លឹម ឃុនស្រ៊ុន បានជម្រាបជូនលោកជំទាវអំពីការត្រៀមខ្លួន
សម្រាប់កិច្ចសហការជាមួយស្ថានទូតគុយបាប្រចាំកម្ពុជាលើការចែករំលែកព័ត៌មានជូនគ្នាទៅវិញទៅមក កម្ពុជា- គុយបា ។លោក​ស្វាគមន៍​សម្រាប់ការមានអនុស្សរណៈយោគយល់គ្នា លើវិស័យសេដ្ឋកិច្ច វប្បធម៌ អប់រំ ទេសចរណ៍ ។លោកអគ្គ​នាយកបានបញ្ជាក់ថា AMS Apsara បានផលិតមាតិកាសម្បូរបែបជាច្រើន ។ទន្ទឹមនឹងកិច្ចសហការផ្សព្វផ្សាយ​ពីប្រទេស​គុយបាដល់ប្រជាជន​កម្ពុជា, AMS Apsara ក៏មានបំណងផ្សព្វផ្សាយពីកម្ពុជាជូន​ទៅដល់ប្រជាជននៃគុយបា និង​ពិភព​លោកបានដឹងដែរ ។

លោកជំទាវឯកអគ្គរដ្ឋទូតគុយបា បានបញ្ជាក់ថា ដោយសារ​ប្រទេស​ទាំងពីរ គុយបា-កម្ពុជា​ មានទំនាក់ទំនង​ជាប្រវត្តិសាស្រ្ត​ដ៏​យូររួច​មកហើយ ការផ្សព្វផ្សាយព័ត៌មានតាមរយៈAMS Apsara ពុំត្រឹម​តែផ្តល់តម្លៃដល់ប្រវត្តិសាស្រ្តនៃប្រទេសទាំងពីរ​ប៉ុណ្ណោះទេ តែក៏​បានផ្តល់សារសំខាន់ដល់អ្នកជំនាន់ក្រោយ បានដឹងអំពីប្រវត្តិសាស្រ្ត​នេះផងដែរ។

សូមជម្រាបថា កម្ពុជា- គុយបាបានបង្កើតទំនាក់ទំនងការទូត​នៅថ្ងៃទី១៥ ខែមេសា ឆ្នាំ១៩៦០ដោយព្រះបរមរតនកោដ្ឋ នរោត្តម សីហនុ និងឯកឧត្តម ហ្វីដែល កាស្រ្តូ( Fidel Castro) ខណៈ​ប្រទេសទាំងពីរជាសមាជិកនៃចលនា​មិនចូលបក្ស​សម្ព័ន្ធ ។

ដោយឡែកក្នុងឱកាសអញ្ជើញបំពេញទស្សនកិច្ចផ្លូវការនៅសាធារណរដ្ឋគុយបាកាលពីថ្ងៃទី២៣ ដល់ ថ្ងៃទី២៥ ខែកញ្ញា ឆ្នាំ២០២២ សម្ដេចតេជោ ហ៊ុន សែន នៅពេលនោះសម្តេចជានាយករដ្ឋមន្រ្តីកម្ពុជា ​,សម្ដេចនិង​គណៈប្រតិភូចូល​ជួប​សម្តែងការគួរសម​លោក រ៉ាអ៊ួល កាស្ត្រូ អតីតប្រធានាធិបតីគុយបា ត្រូវជាប្អូនប្រុសបង្កើតរបស់លោក ហ្វីដែល កាស្រ្តូ ដល់​លំនៅដ្ឋាន​ក្នុង​រដ្ឋធានីហាវ៉ាណា។អំឡុងពេល​នោះសម្តេចតេជោ ហ៊ុន សែន បានជម្រាបលោក រ៉ាអ៊ួល កាស្ត្រូ ថា ទំនាក់​ទំនង​រវាងសម្តេច និងលោក ហ្វីដែល កាស្ត្រូ ហាក់បីដូចជាឪពុក និងកូន៕
ដោយ៖មុនី
រូបថត៖ វេង លឹមហួត