បរទេស ៖ លោក Donald Trump បានជំនះប្រើប្រាស់ ច្បាប់សម័យសង្គ្រាម Alien Enemies Act of 1798 ឬ ច្បាប់ប្រឆាំងសត្រូវបរទេសរបស់សហរដ្ឋអាមេរិកឆ្នាំ១៧៩៨ ដែលមានអាយុកាលជាង២០០ឆ្នាំ ដើម្បីបណ្តេញជនអន្តោប្រវេសន៍។

យោងតាមការចុះផ្សាយរបស់ទីភ្នាក់ងារព័ត៌មាន BBC បានឲ្យដឹងថា លោក Trump បានសម្រេចចុះហត្ថលេខាលើបទបញ្ជាប្រតិបត្តិ ដោយប្រើប្រាស់ច្បាប់ អាយុកាល២២៧ឆ្នាំនេះ ដើម្បីបណ្តេញក្រុមសង្គមងងឹតវេណេស៊ុយអេឡា «Tren de Aragua» ជាង២០០នាក់ នាពេលថ្មីៗនេះ។

បើទោះបីជា ចៅក្រមនៃតុលាការសហព័ន្ធ បានចេញបម្រាមបណ្តោះអាសន្ន រយៈពេល១៤ថ្ងៃរារាំងការបណ្តេញ ដែលអនុលោមតាមច្បាប់ប្រឆាំងសត្រូវអាមេរិកនេះក៏ដោយ ក្រុមសង្គមងងឹត ចំនួន២៣៨នាក់ ត្រូវបានបណ្តេញចេញពីអាមេរិក ហើយបញ្ជូនទៅញាត់គុក នៅក្នុងប្រទេស អែលសាល់វេឌឺ កាលពីចុងសប្តាហ៍ ។

ចៅក្រមបានអះអាងថា ច្បាប់នេះ គឺអនុវត្តបានតែក្នុងលក្ខខណ្ឌកើតមានសង្គ្រាម ប៉ុណ្ណោះ ប៉ុន្តែ រដ្ឋបាលលោក Trump បានអះអាងថា ក្រុមសង្គមងងឹតទាំងនេះបានធ្វើឱ្យសហរដ្ឋអាមេរិក ប្រឈមនឹងការឈ្លានពាន៕

ប្រភពពី BBC ប្រែសម្រួល៖ សារ៉ាត