បរទេស ៖ បណ្តាម្ចាស់ជំនួយបានសន្យាប្រមូលថវិកា ជាង៦ពាន់លានដុល្លារអាមេរិក សម្រាប់ជួយដល់ប្រទេសស៊ីរី ក្រោយការចាកចេញ របស់លោក Assad នេះបើតាមសហភាពអឺរ៉ុប ហៅកាត់ EU។

ម្ចាស់ជំនួយអន្តរជាតិបានសន្យា ផ្តល់ការចំណាយចំនួន ៥.៨ ពាន់លានអឺរ៉ូ ឬស្មើនឹង ៦.៣ពាន់លានដុល្លារអាមេរិក សម្រាប់ប្រទេសស៊ីរី កាលពីថ្ងៃច័ន្ទ។ ជាការសន្យាធ្វើឡើង នៅឯសន្និសីទដ៏សំខាន់មួយ នៅទីក្រុងប្រ៊ុចសែល ប្រទេសប៊ែលហ្ស៊ិក ហើយ វេទិកានោះ ត្រូវបានរៀបចំឡើង ក្នុងគោលបំណងដើម្បីស្វែងរកការជួយកំណត់អនាគត របស់ប្រទេស ដែលហែកហួរដោយសង្រ្គាម និង កំពុងស្ថិតនៅលើផ្លូវ ឆ្ពោះទៅរកស្ថិរភាព បន្ទាប់ពីការបណ្តេញ លោក Bashar al-Assad អតីតប្រធានាធិបតីប្រទេសស៊ីរី ចេញពីប្រទេស។

ស្នងការសហភាពអឺរ៉ុប សម្រាប់តំបន់មេឌីទែរ៉ាណេ លោកស្រី Dubravka Suica បាននិយាយថា «រួមគ្នា យើងបានសន្យាផ្តល់ជំនួយ និងប្រាក់កម្ចី សរុបចំនួន ៥.៨ពាន់លានអឺរ៉ូ» ដោយលោកស្រីបានបន្ថែមទៀតថា ជំនួយមានចំនួន ៤.២ពាន់លានអឺរ៉ូ ហើយ ប្រាក់កម្ចី ចំនួន១.៦ ពាន់លានអឺរ៉ូ៕

ប្រភពពី AFP ប្រែសម្រួល៖ សារ៉ាត