វ៉ាស៊ីនតោន ៖ ប្រធានាធិបតីអាមេរិក លោក Donald Trump និយាយថា លោក និង មេដឹកនាំរុស្ស៊ី លោក Vladimir Putin បានយល់ស្របលើជំហានដំបូងជាច្រើន នៃកិច្ចព្រមព្រៀងសន្តិភាពនៅអ៊ុយក្រែន នៅមុនការសន្ទនាតាមទូរស័ព្ទដែលគ្រប់គ្នាបានរំពឹងទុក។

ផ្អែកតាមសេចក្តីរាយការណ៍របស់កាសែតរ៉យទ័រ វិមានក្រឹមឡាំងក៏បានទទួលស្គាល់អំពីការសន្ទនាតាមទូរស័ព្ទរវាងលោក Putin និង លោក Trump នៅថ្ងៃអង្គារនេះ ដែលនឹងផ្តោតសំខាន់លើរោងចក្រថាមពល និងរឿងទឹកដីអ៊ុយក្រែន។

លោក Trump បានបង្ហោះសារនៅលើវេទិកា Truth Social ថា លោកនឹងនិយាយជាមួយលោក Putin នៅព្រឹកថ្ងៃអង្គារនេះ (ម៉ោងក្នុងតំបន់) ដោយលោកបានបន្ថែមថា នៅមានកិច្ចព្រមព្រៀងសេសសល់ជាច្រើនទៀតដែលត្រូវធ្វើ។

មេដឹកនាំអាមេរិករូបនេះបានបញ្ជាក់យ៉ាងដូច្នេះថា រៀងរាល់សប្តាហ៍ ទាហានទាំងសងខាងប្រហែល ២.៥០០ នាក់ត្រូវបានសម្លាប់ ដូច្នេះហើយវាត្រូវតែបញ្ចប់នៅពេលនេះ។ ខ្ញុំទន្ទឹងរង់ចាំយ៉ាងអន្ទះសារចំពោះការនិយាយទូរស័ព្ទជាមួយលោកប្រធានាធិបតី Putin។

លោកប្រធានាធិបតី Trump បានប្រាប់អ្នកកាសែតនាពេលថ្មីៗនេះថា យើងកំពុងរង់ចាំមើល ថាតើយើងអាចបង្កើតកិច្ចព្រមព្រៀងសន្តិភាព ឬក៏បទឈប់បាញ់ និងសន្តិភាពបានទេ ហើយខ្ញុំគិតថា យើងនឹងអាចធ្វើវាបាន។

ដោយឡែក ប្រធានាធិបតីអ៊ុយក្រែន លោក Volodymyr Zelensky នៅក្នុងសុន្ទរកថាតាមវីដេអូនៅពេលយប់របស់ខ្លួន បានចោទលោកប្រធានាធិបតី Putin ថា បានអូសបន្លាយសង្រ្គាម ហើយថា នៅពេលមេដឹកនាំរុស្ស៊ីរូបនេះបានដឹងជាមុនយូរមកហើយពីសំណើបទឈប់បាញ់ ប៉ុន្តែបានអូសបន្លាយពេលមិនយល់ព្រមភ្លាមៗ។

យ៉ាងណា បច្ចុប្បន្នលោក Trump កំពុងព្យាយាមយកឈ្នះការគាំទ្ររបស់លោក Putin សម្រាប់សំណើបទឈប់បាញ់ ៣០ថ្ងៃ ដែលអ៊ុយក្រែនបានទទួលយកកាលពីសប្តាហ៍មុន ខណៈភាគីជម្លោះទាំងពីរបានបន្តវាយប្រហារតាមអាកាសយ៉ាងខ្លាំងក្លានៅព្រឹកថ្ងៃចន្ទ ហើយរុស្ស៊ីបានខិតទៅជិតការបណ្តេញកងកម្លាំងអ៊ុយក្រែន ចេញពីទីតាំងឈរជើងជាច្រើនខែរបស់ពួកគេនៅតំបន់ Kursk ភាគខាងលិចរុស្ស៊ី៕

ប្រភព ៖ Reuters និង BBC ប្រែសម្រួល ៖ ឈឹម ទីណា