មូស្គូ ៖ អតីតប្រធានាធិបតីរុស្ស៊ី លោក Dmitry Medvedev បានគំរាមផ្ទុះសង្គ្រាមជាមួយអង្គការណាតូ ប្រសិនបើបណ្តាប្រទេសក្នុងប្លុកអឺរ៉ុប នៅតែរឹងទទឹងប្រកាន់ខ្ជាប់ផែនការដាក់ពង្រាយកងកម្លាំងរក្សាសន្តិភាពទៅកាន់អ៊ុយក្រែន។ នេះបើតាមការចេញផ្សាយដោយសារព័ត៌មាន DPA។

លោក Medvedev ដែលបច្ចុប្បន្នកាន់តំណែងអនុប្រធានក្រុមប្រឹក្សាសន្តិសុខរុស្ស៊ី បានបង្ហោះសារនៅលើវេទិកា X ដោយចំអកដាក់ប្រធានាធិបតីបារាំង លោក Emmanuel Macron និងនាយករដ្ឋមន្ត្រីអង់គ្លេស លោក Keir Starmer ថា “កំពុងលេងសើចនឹងសង្គ្រាម”។

លោក Medvedev បានគូសបញ្ជាក់ថា ដូចដែលបានប្រាប់ពួកគេរួចមកហើយថា កងកម្លាំងរក្សាសន្តិភាពត្រូវតែមកពីរដ្ឋមិនមែនសមាជិកអង្គការណាតូ ហើយអ្នកដែលនៅតែចចេសចង់ផ្តល់ជំនួយយោធាដល់របបដឹកនាំទីក្រុងកៀវ គឺប្រៀបដូចជាកំពុងនាំសង្គ្រាមដល់ណាតូ និងជាការប្រមាថចំពោះផែនការសន្តិភាពរបស់ប្រធានាធិបតីអាមេរិក លោក Donald Trump។

ការព្រមានធ្ងន់ៗរបស់លោក Medvedev កើតឡើងបន្ទាប់ពីលោកនាយករដ្ឋមន្ត្រីអង់គ្លេស Starmer បានស្នើឱ្យប្រទេសជាច្រើនស្ម័គ្រចិត្តចូលរួមផ្តល់កងកម្លាំងរក្សាសន្តិភាពនៅអ៊ុយក្រែន ក្នុងករណីដែលកិច្ចព្រមព្រៀងសន្តិភាព ត្រូវសម្រេចបានជាមួយរុស្ស៉ី។ នេះបើតាមសេចក្តីរាយការណ៍របស់កាសែតរ៉យទ័រ។

អ្នកនាំពាក្យរបស់លោក Starmer បានប្រាប់ក្រុមអ្នកសារព័ត៌មានថា ប្រទេសសរុបច្រើនជាង៣០ ត្រូវបានរំពឹងថា នឹងចូលរួមក្នុងផែនការនេះ ហើយថា សមត្ថភាពចូលរួមចំណែកពីប្រទេសនីមួយៗ នឹងខុសៗគ្នា ប៉ុន្តែវានឹងជាកងកម្លាំងធំមួយ ដោយមានប្រទេសជាច្រើនចូលរួមផ្តល់កងទ័ព។

យ៉ាងណា រុស្ស៉ីធ្លាប់បានច្រានចោលម្តងហើយម្តងទៀត នូវគំនិតដាក់ពង្រាយកងទ័ពមកពីបណ្តាប្រទេសនៃអង្គការណាតូនៅអ៊ុយក្រែន។ ហើយថ្មីៗនេះ ប្រធានាធិបតីបារាំង លោក Emmanuel Macron បាននិយាយថា រឿងដាក់ពង្រាយកងកម្លាំងរក្សាសន្តិភាពនៅអ៊ុយក្រែន គឺសម្រាប់ឱ្យទីក្រុងកៀវជាអ្នកសម្រេច មិនមែនទីក្រុងមូស្គូនោះទេ៕

ប្រភព ៖ Reuters និង DPA ប្រែសម្រួល ៖ ឈឹម ទីណា