បរទេស៖ ក្រោយទទួលបានភ្លើងខៀវពីសហរដ្ឋអាមេរិក យន្តហោះចម្បាំងជាង២០គ្រឿងរបស់ប្រទេសអ៊ីស្រាអែលបានហោះទៅវាយសង្គ្រុប លើតំបន់ ហ្គាហ្សា ស្លាប់មនុស្សអស់ ជាង៣០០នាក់ កាលពីយប់ថ្ងៃចន្ទ។

យោងតាមទីភ្នាក់ងារព័ត៌មាន BBC បានចុះផ្សាយថា សាក្ស៊ីបានឃើញយន្តហោះចម្បាំងរបស់អ៊ីស្រាអែលទាំងនោះ ហោះពីលើអាកាស មុនពេលចាប់ផ្តើមវាយលុកយ៉ាងចាស់ដៃទៅលើទីក្រុងចំនួនបី របស់តំបន់ហ្គាហ្សា ស្ទ្រីប គឺ ទីក្រុង Gaza City , Rafah និង ទីក្រុង Khan Younis។

មន្ត្រីនាំពាក្យសេតវិមានម្នាក់ បានប្រាប់ Fox News ថា មុនពេលបើកការវាយប្រហារនេះ អ៊ីស្រាអែលបានរាយការណ៍ជាមុន ដល់រដ្ឋបាល របស់លោកប្រធានាធិបតី Donald Trump។ នាយករដ្ឋមន្ត្រីអ៊ីស្រាអែល លោក Benjamin Netanyahu បានចេញសេចក្តីថ្លែងការណ៍ថា ការវាយប្រហារនេះបានកើតឡើង ក្រោយពេលដែលហាម៉ាស់ បដិសេធសំណើដោះលែងចំណាប់ខ្លាំង តាមបំណង របស់ប្រេសិតពិសេស របស់ប្រធានាធិបតី Trump គឺលោក Steve Witkoff ។

យ៉ាងណាមិញ ហាម៉ាស់ បានឆ្លើយតបវិញថា ទង្វើរបស់អ៊ីស្រាអែលបែបនេះ បង្ហាញថា ជោគវាសនារបស់ចំណាប់ខ្មាំង មិនអាចធានាបានទៀតទេ ហើយចោទថា អ៊ីស្រាអែល បានក្បត់នឹងកិច្ចព្រមព្រៀងបទឈប់បាញ់។

យោងតាមក្រសួងសុខាភិបាលហ្គាហ្សា ដែលគ្រប់គ្រងដោយពួកហាម៉ាស់ បានឲ្យដឹងថា ការវាយប្រហាររបស់អ៊ីស្រាអែល កាលពីយប់ថ្ងៃចន្ទ បានសម្លាប់មនុស្ស ៣៣០នាក់ ភាគច្រើន គឺ ជាស្ត្រី និងកុមារ។

នេះគឺជាការវាយប្រហារតាមអាកាស ចូលតំបន់ហ្គាហ្សា ដ៏ធំ ចាប់តាំងពីការចូលជាធរមាន នៃបទឈប់បាញ់ កាលពីថ្ងៃទី១៩ ខែមករា។ ក្រោយកើតហេតុ គម្រោងពិភាក្សាប៉ុនប៉ង បន្តអូសបន្លាយបទឈប់បាញ់ បានបរាជ័យ។ ប៉ុន្តែ ក្រុមហាម៉ាស់មិនទាន់បានប្រកាសថា ខ្លួននឹងបន្តសង្រ្គាមទេ ផ្ទុយទៅវិញ បានអំពាវនាវឱ្យអ្នកសម្របសម្រួល និងអង្គការសហប្រជាជាតិ ជួយអន្តរាគមន៍។

គួររម្លឹកថា សង្គ្រាមផ្ទុះឡើងដំបូង តាំងពីថ្ងៃទី៧ ខែតុលា ឆ្នាំ២០២៣ ដោយពេលនោះ ពួកហាម៉ាស់បានវាយឆ្មក់ចូលទឹកដីអ៊ីស្រាអែល ស្លាប់មនុស្ស ជាង១ពាន់នាក់។ ចាប់ចំណាប់ខ្មាំងជាង២០០នាក់។ ជាការសងសឹក អ៊ីស្រាអែល បានវាយប្រហារ សម្លាប់មនុស្ស ជិត៥ម៉ឺននាក់ហើយ នៅតំបន់ហ្គាហ្សា ដែលគ្រប់គ្រងដោយពួកប្រដាប់អាវុធហាម៉ាស់ តែ អ្នកស្លាប់ ភាគច្រើន គឺ ជាជនស៊ីវិល៕

ប្រភពពី AFP ប្រែសម្រួល៖ សារ៉ាត