(ភ្នំពេញ)៖ សម្តេចបវរធិបតី ហ៊ុន ម៉ាណែត បានថ្លែងថា ការកសាងមូល​ធននយោបាយ គឺការកសាងជំនឿទុកចិត្ត និងការប្រាស្រ័យ​ទាក់ទងល្អ រវាង ប្រជាជន និង ស្ថាប័នសាធារណៈ ។ ការថ្លែង​របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដូច្នេះ ក្នុងវេទិការវាងរាជ​រដ្ឋាភិបាល និងរដ្ឋបាលថ្នាក់ក្រោមជាតិ លើកទី១ (២០២៤-២០២៥) ស្តីពី “កំណែទម្រង់វិមជ្ឈការ និង​វិសហ​មជ្ឈការ ដើម្បីចូលរួមសម្រេចបានចក្ខុវិស័យ​កម្ពុជា​ឆ្នាំ២០៥០” នៅសណ្ឋាគារសុខាភ្នំពេញ នាថ្ងៃទី១៨ ខែមីនា ឆ្នាំ២០២៥ ។

សម្តេចធិបតី បានថ្លែងថា ការកសាងមូលធននយោបាយ គឺការកសាងជំនឿទុកចិត្ត និងការប្រាស្រ័យទាក់ទងល្អ រវាង ប្រជាជន និង ស្ថាប័នសាធារណៈ ដែលជាតំណាងឱ្យ​ផល​ប្រយោជន៍ប្រជាជន ប្រកបដោយ គណនេយ្យភាព តម្លាភាព បរិយាបន្ន និង សមធម៌ ។ ការកសាងមូលធនសង្គម ក៏ដើម្បីកសាង ទំនាក់ទំនងល្អ រវាងប្រជាជន និងប្រជាជន ដោយ គ្មានការរើសអើង មិនប្រកាន់និន្នាការនយោបាយ និងក្រុមសហគមន៍ផ្សេងៗគ្នានៅក្នុងសង្គម ។

សម្តេច បានបញ្ចាក់ថា បន្ទាប់ពីកម្ពុជា ទទួលបានសុខសន្តិភាព ការឯកភាពជាតិ និងការឯកភាពទឹកដីពេញលេញ តាមរយៈ នយោបាយ ឈ្នះ-ឈ្នះ ផ្តួចផ្តើម និងដឹកនាំអនុវត្ត​ដោយ​សម្តេច​តេជោ ហ៊ុន សែន ប្រធានព្រឹទ្ធសភា រាជរដ្ឋាភិបាល បានចាប់​ផ្តើម កែទម្រង់លើគ្រប់វិស័យ ដើម្បីធានារក្សាឱ្យបាន នូវសុខ​សន្តិ​ភាព, សន្តិសុខ សណ្តាប់ធ្នាប់ សាធារណៈ និងសុវត្ថិភាព​សង្គម ក្នុងគោលដៅអភិវឌ្ឍ សង្គមសេដ្ឋកិច្ច តាមបែបប្រជា​ធិបតេយ្យ ។

ចំពោះការកែទម្រង់វិមជ្ឈការ និងវិសហមជ្ឈការ សម្តេចធិបតី បានបញ្ជាក់ថា រាជរដ្ឋាភិបាល បានចាប់ផ្តើមសិក្សា ដោយមានការពិគ្រោះយោបល់ យ៉ាងទូលំទូលាយ និងល្អិតល្អន់អំពីជម្រើសនានា សម្រាប់ការរៀបចំ និងការអនុវត្តគោលនយោបាយ វិមជ្ឈការនាឆ្នាំ១៩៩៩។ ផ្អែកលើការសិក្សានេះ រាជរដ្ឋាភិបាលបានចាត់ទុកការ​កែ​ទម្រង់នេះ ជាការកែទម្រង់ស្នូលមានលក្ខណៈជាប្រព័ន្ធ ដ៏ មានសារសំខាន់មួយក្នុងចំណោមការដ្ឋានកែទម្រង់ស្នូលនានា ដើម្បីកសាងមូលធនសង្គម និង មូលធននយោបាយដែលជា​បុរេ​​លក្ខខណ្ឌសម្រាប់ ការស្តារ និងការអភិវឌ្ឍប្រទេសជាតិ​ឡើង​វិញ លើគ្រប់វិស័យ ៕

អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ