វ៉ាស៊ីនតោន ៖ ប្រធានាធិបតីអាមេរិក លោក Donald Trump និយាយថា មេដឹកនាំចិន លោក Xi Jinping នឹងធ្វើទស្សនកិច្ចនៅទីក្រុងវ៉ាស៊ីនតោនឆាប់ៗនេះ បើទោះបីជាមហាអំណាចពិភពលោកទាំងពីរមានភាពតានតឹងពាណិជ្ជកម្ម ដោយសារសង្គ្រាមពន្ធរបស់លោក Trump ក៏ដោយ។

លោកប្រធានាធិបតី Trump បានបង្ហើបប្រាប់អ្នកកាសែតថា លោក Xi នឹងមកសហរដ្ឋអាមេរិកក្នុងពេលអនាគតដ៏ខ្លីខាងមុខនេះ ប៉ុន្តែលោកមិនបានផ្តល់ព័ត៌មានលម្អិតបន្ថែមទេ។

បើតាមសេចក្តីរាយការណ៍របស់កាសែត Wall Street Journal កាលពីសប្តាហ៍មុន មន្ត្រីអាមេរិក និង ចិន បានចាប់ផ្តើមពិភាក្សាអំពីកិច្ចប្រជុំកំពូលដែលអាចកើតមាននៅក្នុងខែមិថុនា នៅសហរដ្ឋអាមេរិក។

លោក Xi ធ្លាប់បានទៅបំពេញទស្សនកិច្ចលើកចុងក្រោយនៅសហរដ្ឋអាមេរិកក្នុងខែវិច្ឆិកា ឆ្នាំ ២០២៣ ដើម្បីជួបលោកប្រធានាធិបតី Joe Biden នៅរដ្ឋកាលីហ្វ័រញ៉ា ក្នុងគោលបំណងបន្ធូរបន្ថយភាពតានតឹងដែលកំពុងកើនឡើងរវាងមហាអំណាចទាំងពីរ៕

ប្រភព ៖ AFP ប្រែសម្រួល ៖ ឈឹម ទីណា