សាណាអា ៖ ក្រុមហ៊ូទីនៅយេម៉ែនបានវាយប្រហារលើនាវាផ្ទុកយន្តហោះអាមេរិកនៅភាគខាងជើងសមុទ្រក្រហមជាលើកទី ៣ ក្នុងរយៈពេល ៤៨ម៉ោងចុងក្រោយនេះ ខណៈដែលយោធាអាមេរិកក៏បានបើកការវាយលុកផ្លូវអាកាសថ្មីៗលើរដ្ឋធានីសាណាអា ដែលគ្រប់គ្រងដោយក្រុមឧទ្ទាមមួយនេះ។

អ្នកនាំពាក្យយោធាក្រុមហ៊ូទី លោក Yahya Sarea បាននិយាយនៅក្នុងសេចក្តីថ្លែងការណ៍មួយថា យើងបានកំណត់គោលដៅវាយលុកលើនាវាផ្ទុកយន្តហោះអាមេរិក USS Harry Truman នៅភាគខាងជើងសមុទ្រក្រហម ដោយប្រើប្រាស់មីស៊ីសបញ្ជាទិសចំនួន ២គ្រាប់ និងយន្តហោះដ្រូនពិឃាតចំនួន ២គ្រឿង។

អ្នកនាំពាក្យរូបនេះ ក៏បានអះអាងដែរថា ពួកគេនឹងមិនបញ្ឈប់ការវាយប្រហារនៅសមុទ្រក្រហម និងសមុទ្រអារ៉ាប់ឡើយ រហូតទាល់តែការឈ្លានពានប្រឆាំងនឹងប្រទេសយេម៉ែនបញ្ឈប់។

ក្នុងរយៈពេលពីរថ្ងៃមកនេះ ទីតាំងយោធា និងផ្ទះសម្បែងរាប់សិបខ្នង បានរងការវាយប្រហារ និងទម្លាក់គ្រាប់បែកដោយយន្តហោះចម្បាំងរបស់អាមេរិកនៅទូទាំងទីក្រុងសាណាអា និងខេត្តភាគខាងជើង និងខាងលិចមួយចំនួនទៀត ដែលស្ថិតនៅក្រោមការគ្រប់គ្រងរបស់ក្រុមហ៊ូទី។

បើតាមសេចក្តីថ្លែងការណ៍ចុងក្រោយពីអាជ្ញាធរសុខាភិបាលដែលគ្រប់គ្រងដោយក្រុមហ៊ូទី ចំនួនអ្នកស្លាប់ដោយសារការវាយប្រហារតាមអាកាសរបស់យោធាអាមេរិកក្នុងរយៈពេលពីរថ្ងៃមកនេះ បានកើនឡើងដល់ ៥៣នាក់ ក្នុងនោះមានកុមារ ៥នាក់ និងស្ត្រី ២នាក់។

ទន្ទឹមគ្នា មេដឹកនាំអាមេរិក លោក ដូណាល់ ត្រាំ ថែមទាំងបានប្តេជ្ញាបន្តការវាយប្រហារតាមផ្លូវអាកាស រហូតដល់ក្រុមឧទ្ទាមហ៊ូទី បញ្ឈប់ការវាយប្រហារលើបណ្តាញដឹកជញ្ជូន និងកប៉ាល់អន្តរជាតិ៕

ប្រភព ៖ AFP ប្រែសម្រួល ៖ ឈឹម ទីណា