(ភ្នំពេញ)៖ បន្ទាប់ពីពិធីបើកសន្និបាត ក្រោមអធិបតីភាពដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី ហ៊ុន ម៉ានី រួចមក ថ្នាក់ដឹកនាំក្រសួងមុខងារសាធារណៈ បានចែករំលែកបទពិសោធ និងលទ្ធផលការងារ ជាព័ត៌មានសម្រាប់អង្គភាពដទៃទៀត បានទាញយកជាប្រយោជន៍ផង និងផ្លាស់ប្តូរយោបល់ផង ដើម្បីជាមូលដ្ឋានក្នុងការកំណត់ទិសដៅ យុទ្ធសាស្ត្រ និងរៀបចំផែនការសកម្មភាពសម្រាប់ឆ្នាំបន្តបន្ទាប់ ។

មានប្រសាសន៍ក្នុងបទបង្ហាញ ស្តីពី «វឌ្ឍនភាពនៃការដឹកនាំ និងការគ្រប់គ្រងវិស័យមុខងារសាធារណៈ» ឯកឧត្តម ហាស់ ប៊ុនថ្ថន អគ្គលេខាធិការនៃអគ្គលេខាធិការដ្ឋានក្រសួងមុខងារសាធារណៈ បានលើកឡើងថា “សម្រាប់ដើមឆ្នាំ២០២៥ ចំនួនមន្ត្រីរាជការស៊ីវិលសរុបទូទាំងប្រទេស មានការថយចុះបើធៀបនឹងខែឧសភា ឆ្នាំ២០២៤។”

ឯកឧត្តមអគ្គលេខាធិការ បានលើកឡើងបែបនេះដោយបានពន្យល់បន្ថែមថា មន្ត្រីរាជការនៅថ្នាក់ក្រោមជាតិទំនោរថយចុះជាបន្តបន្ទាប់ និងមន្ត្រីថ្នាក់កណ្តាលមានចំនួនកើនឡើង ដោយសារមានតម្រូវការចាំបាច់របស់រាជរដ្ឋាភិបាល ជាពិសេសការជ្រើសរើសមន្ត្រីកសិកម្មឃុំ ដែលក្រសួងមុខងារសាធារណៈ បានដឹកនាំរៀបចំការប្រឡងប្រជែងជ្រើសរើសប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ក្នុងន័យនេះ ឯកឧត្តមអគ្គលេខាធិការបានបង្ហាញស្ថានភាពជារួមថា “ចំនួនមន្ត្រីរាជការស៊ីវិលទូទាំងប្រទេសមានការថយចុះ”។

ការថយចុះនៃចំនួនមន្ត្រីរាជការស៊ីវិលនេះ ជាផ្នែកមួយនៃការចូលរួមកែទម្រង់រដ្ឋបាលសាធារណៈ ស្របតាមអភិក្រម «ពង្រឹងជាជាងពង្រីក» រួមទាំងជាផ្នែកមួយដ៏សំខាន់ ក្នុងការចូលរួមសន្សំសំចៃបន្ទុកបុគ្គលិករបស់រាជរដ្ឋាភិបាលផងដែរ៕

ដោយ ៖ ង៉ាន់ ទិត្យ