UN តក់ស្លុតនឹងការវាយប្រហាររបស់អ៊ីស្រាអែល
បរទេស ៖ អង្គការសហប្រជាជាតិ ហៅកាត់ UN បានបង្ហាញពីការតក់ស្លុត ចំពោះការវាយប្រហារ របស់អ៊ីស្រាអែល ទៅលើតំបន់ហ្គាហ្សា ថ្មីៗនេះ។
លោក Rolando Gomez អ្នកនាំពាក្យអង្គការសហប្រជាជាតិ បាននិយាយថា អគ្គលេខាធិការ UN លោក Antonio Guterres រន្ធត់ចិត្ត ចំពោះការវាយប្រហារតាមអាកាសជាថ្មី របស់អ៊ីស្រាអែល លើតំបន់ហ្គាហ្សា ស្ទ្រីប។
លោកបានប្រាប់សន្និសីទសារព័ត៌មាន នៅទីក្រុងហ្សឺណែវថា «អគ្គលេខាធិការ មានការតក់ស្លុត ចំពោះការវាយប្រហារតាមអាកាស របស់អ៊ីស្រាអែល នៅហ្គាហ្សា»។
លោក Rolando Gomez បានបន្ថែមថា «លោក Guterres សូមអំពាវនាវយ៉ាងមុតមាំ ឱ្យបទឈប់បាញ់ត្រូវបានគោរព ជំនួយមនុស្សធម៌គ្មានការរារាំង ហើយ ចំណាប់ខ្មាំងដែលនៅសល់ ត្រូវដោះលែង ដោយគ្មានលក្ខខណ្ឌ»។
គួររម្លឹកថា យន្តហោះចម្បាំងជាង២០គ្រឿងរបស់ប្រទេសអ៊ីស្រាអែលបានហោះទៅវាយសង្គ្រុប លើតំបន់ហ្គាហ្សា ស្លាប់មនុស្សអស់៣៣០នាក់ រួមមានទាំង ស្ត្រី និងកុមារផងដែរ កាលពីយប់ថ្ងៃចន្ទ។ នេះគឺជាការវាយប្រហារតាមអាកាស ចូលតំបន់ហ្គាហ្សាដ៏ធំ ចាប់តាំងពីការចូលជាធរមាន នៃបទឈប់បាញ់ កាលពីថ្ងៃទី១៩ ខែមករា។ ក្រោយកើតហេតុ គម្រោងពិភាក្សាប៉ុនប៉ង បន្តអូសបន្លាយបទឈប់បាញ់ បានបរាជ័យ៕
ប្រភពពី AFP ប្រែសម្រួល៖ សារ៉ាត