បរទេស ៖ មានការផ្ទុះគ្រាប់បែក នៅក្នុងរដ្ឋធានី Mogadishu របស់ប្រទេសសូម៉ាលីនៃទ្វីបអាហ្រ្វិក នៅប៉ុន្មាននាទី បន្ទាប់ពីក្បួនរថយន្តប្រធានាធិបតី ឆ្លងកាត់បានបន្តិច កាលពីថ្ងៃអង្គារ។

ការវាយប្រហារដោយឧបករណ៍បំផ្ទុះមិនទាន់សម័យ ហៅកាត់ IED បានបំផ្លាញអគារមួយ នៅក្នុងរដ្ឋធានី បន្ទាប់ពីក្បួនប្រធានាធិបតី Hassan Sheikh Mohamud បានឆ្លងកាត់តាមផ្លូវនោះ បានប៉ុន្មាននាទី នេះបើយោងតាមមន្ត្រីសន្តិសុខ និងសាក្សី។

ក្រុមរដ្ឋអ៊ីស្លាម Al-Shabaab បានអះអាងទទួលខុសត្រូវ ចំពោះការវាយប្រហារ។ ហេតុការណ៍នេះបានកើតឡើង ក្រោយមួយសប្តាហ៍ បន្ទាប់ពីការវាយប្រហាដ៏សាហាវ របស់ក្រុម Al-Shabaab ទៅលើសណ្ឋាគារមួយ ដែលបានសម្លាប់ជនស៊ីវិល ៩នាក់។

រហូតមកដល់ពេលនេះ មិនទាន់មានរបាយការណ៍ពីអ្នកស្លាប់ ក្នុងឧបទ្ទវហេតុផ្ទុះចុងក្រោយ នេះទេ។ សាក្សីប្រាប់ថា អ្នកដំណើរជាច្រើននាក់ បានរងរបួស តែ រដ្ឋាភិបាលនិយាយថា មិនមាននរណាម្នាក់ រងរបួសនោះទេ។

Al-Shabaab បានប្រយុទ្ធជាមួយរដ្ឋាភិបាល អស់រយៈពេល ជាង១៥ឆ្នាំមកហើយ ដោយបានធ្វើការវាយប្រហារ យ៉ាងសាហាវ នៅក្នុងទីក្រុង Mogadishu និង តំបន់ផ្សេងទៀត។

ទោះបីជាពួកគេត្រូវបានបណ្តេញចេញពីទីក្រុង ដោយកងកម្លាំងសហភាពអាហ្រ្វិក ក្នុងឆ្នាំ២០១១ ក៏ដោយ ក៏ពួកគេនៅតែមានវត្តមាន នៅតាមតំបន់ជនបទ។ កងកម្លាំងសហភាពអាហ្វ្រិក និងអាមេរិក គាំទ្ររដ្ឋាភិបាលប្រយុទ្ធនឹងក្រុមនេះ៕

ប្រភពពី AFP ប្រែសម្រួល៖ សារ៉ាត