បាត់ដំបង៖ផ្លូវដីល្បាយក្រួសមួយខ្សែប្រវែងជិតបីគីឡូម៉ែត្រ ,ទទឹង​៨ម៉ែត្រនិងព្រមទាំងលូប្រអប់ចំនួនបីកន្លែង ស្ថិតនៅភូមិ​ព្រែកត្រប់ ឃុំព្រែកនរិន្ទ ស្រុកឯកភ្នំ ខេត្តបាត់ដំបង ត្រូវបានបើកការដ្ឋាន​សាង់​សង់នៅដើមសប្ដាហ៍​នេះក្រោមវត្តមាន​ចូលរួមពីឯកឧត្តម ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទតំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួង​អភិវឌ្ឍន៍ជនបទ។នេះជាការតភ្ជាប់​ហេដ្ឋា​រចនាសម្ព័ន្ធជនបទដ៏សំខាន់ ដែលនឹងចូលរួមបង្កើនចំណូលគ្រួសារ​ប្រជាជននៅទីនេះដោយផ្ទាល់ និងប្រជាជននៃតំបន់​ដទៃ​​ដោយ​ប្រយោល ។

នាយកដ្ឋានស្ថាបនានិងវិស្វកម្មអគ្គនាយកដ្ឋានភស្តុភារនិងហិរញ្ញវត្ថុ ក្រសួងមហាផ្ទៃ បានទទួលសាងសង់​ផ្លូវដីល្បាយ​ក្រួសមួយខ្សែនេះ ។ ឯកឧត្តម ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទតំណាង​ឯកឧត្តមរដ្ឋមន្ត្រី​ក្រសួងអភិវឌ្ឍន៍ជនបទ ដែល​អញ្ជើញ​ចូលរួមក្នុង​ពិធីបើកការដ្ឋានបានលើកឡើងពីសារសំខាន់នៃ​ការសាងសង់​ផ្លូវនេះ ។គឺជាផ្លូវអាទិភាពបម្រើ​ដល់​សេដ្ឋកិច្ចជាលក្ខណៈអន្តរឃុំ ដោយតភ្ជាប់​ទៅកាន់ឃុំព្រៃចាស់ ស្រុកឯកភ្នំ ដែលជាចរន្ត​សេដ្ឋកិច្ចក្នុងការ​កាត់​បន្ថយ​ភាព​ក្រីក្ររបស់ប្រជាពលរដ្ឋនៅទីនេះ។

ឯកឧត្តមបានបន្ថែមថា នេះក៏ជាយុទ្ធសាស្ត្ររបស់រាជរដ្ឋាភិបាល​ក្នុងការស្តារឡើងវិញ នូវហេដ្ឋារចនាសម្ព័ន្ធជនបទក្រោម​ពាក្យស្លោក​”មានផ្លូវ មានក្តីសង្ឃឹម” ។ ផ្លូវគឺជាសរសៃឈាមសេដ្ឋកិច្ចជាតិ រួមចំណែកដល់ការអភិវឌ្ឍប្រទេសជាតិ។

សន្តិភាព ក៏ជាកាលានុវត្តន៍នៃការកសាងហេដ្ឋារចនាសម្ព័ន្ធ ។ឯកឧត្តមរដ្ឋលេខាធិការបានគូសរំលេចថា សមិទ្ធផល​ដែលយើង​កំពុងទទួលបាននៅថ្ងៃនេះ គឺដោយសារប្រទេសជាតិមាន “សុខសន្តិភាព” ក្រោមការដឹកនាំរបស់​សម្តេចតេជោ ហ៊ុន សែន អគ្គមគ្គុទ្ទេសក៍ស្ថាបនិកឯក បិតាសន្តិភាព ប្រទេសកម្ពុជា និងបន្តវេន​ដោយសម្តេច​ធិបតី ហ៊ុន ម៉ាណែត នាយករដ្ឋមន្ត្រីកម្ពុជាបច្ចុប្បន្ន៕

អត្ថបទ-រូបភាព៖ អ៊ុក សំអាន បប.