កម្ពុជា និង នេប៉ាល់ កំពុងជំរុញឱ្យមានជើងហោះហើរត្រង់រវាងទីក្រុងភ្នំពេញ និងខេត្ត Lumbini (ទីកន្លែងកំណើតរបស់ព្រះពុទ្ធ)
(ភ្នំពេញ)៖ កម្ពុជា និង នេប៉ាល់ ជំរុញកិច្ចសហប្រតិបត្តិការលើវិស័យទេសចរណ៍ ចំពោះការផ្សព្វផ្សាយនូវគោលដៅទេសចរណ៍សាសនា តំបន់សក្តានុពល និងវប្បធម៌កម្ពុជា ទៅកាន់ពុទ្ធសាសនិក និងប្រជាជនក្នុងប្រទេសនេប៉ាល់ និងជំរុញឱ្យមាន ជើងហោះហើរត្រង់រវាងទីក្រុងភ្នំពេញ និងខេត្ត Lumbini (ទីកន្លែងកំណើតរបស់ព្រះពុទ្ធ)តួយ៉ាងក៏ជំរុញការផ្លាស់ប្តូរបទពិសោធស្តីពីការអភិវឌ្ឍផលិតផលទេសចរណ៍ ការអភិវឌ្ឍធនធានមនុស្សលើវិស័យទេសចរណ៍ និងការជំរុញធុរកិច្ចទេសចរណ៍ទៅវិញទៅមក និងពិនិត្យលទ្ធភាពចុះហត្ថលេខាលើអនុស្សរណៈយោគយល់គ្នា ស្តីពីកិច្ចសហប្រតិបត្តិការលើវិស័យទេសចរណ៍នៃប្រទេសទាំងពីផងដែរ ។
កិច្ចសហប្រតិបត្តិការនេះធ្វើឡើងក្នុងជំនួប ពិភាក្សាការងារ រវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និង ឯកឧត្តម Badri Pandey រដ្ឋមន្រ្តីក្រសួងវប្បធម៌ ទេសចរណ៍ និងអាកាសចរណ៍ស៊ីវិលនៃប្រទេសនេប៉ាល់ កាលពីថ្ងៃទី១៨ ខែមីនា ឆ្នាំ២០២៥ ។
ឯកឧត្តម ហួត ហាក់ បានរំលឹកអំពីប្រវត្តិសាស្ត្រដ៏សម្បូរបែបរបស់កម្ពុជា ដែលកាលពីមុនកម្ពុជា ក៏ធ្លាប់ជាប្រទេសហិណ្ឌូដូចជាប្រទេសនេប៉ាល់ដែរ តែនៅសតវត្សទី១៣ ក៏ប្តូរមកជាប្រទេសកាន់ព្រះពុទ្ធសាសនាវិញ ដូច្នេះ ប្រាសាទ និងទីតាំងប្រវត្តិសាស្ត្រជាច្រើនរបស់កម្ពុជា ដែលត្រូវបានសាងសង់មុនចុងសតវត្សទី១២ គឺដើមឡើយជាប្រាសាទហិណ្ឌូ លើសពីនេះទៅទៀត កម្ពុជាមានប្រាសាទបុរាណជាច្រើនស្ថិតក្នុងខេត្ត សៀមរាប ដែលជាគោលដៅទេសចរណ៍ សាសនា និង វប្បធម៌ដ៏សម្បូរបែបដោយ បានបើកទទួលស្វាគមន៍ចម្រុះជាតិសាសន៍ និងសាសនា រួមទាំងអ្នកកាន់ព្រះពុទ្ធសាសនា ហិណ្ឌូសាសនា និងសាសនាផ្សេងៗទៀត ដើម្បីចូលទស្សនា និង សិក្សាស្រាវជ្រាវផងដែរ ។
ឯកឧត្តមរដ្ឋមន្ត្រី បានឱ្យដឹងថា រាជរដ្ឋាភិបាលនីតិកាលទី៧ ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី កម្ពុជា បានចាត់ទុកវិស័យទេសចរណ៍ជាវិស័យអាទិភាព និងបានរួមចំណែកជិត ១៣% នៃផលិតផលក្នុងស្រុកសរុបដើម្បីជំរុញកំណើនសេដ្ឋកិច្ចជាតិ និងលើកកម្ពស់ជីវភាពប្រជាពលរដ្ឋតាមមូលដ្ឋាន ស្របតាមយុទ្ធសាស្រ្តបញ្ចកោណ-ដំណាក់កាលទី១ ៕
ដោយ ៖ ហេង សម្បត្តិ
