ភ្នំពេញ៖ ប្រមុខការទូតនៃប្រទេសកម្ពុជា និងជប៉ុនបានចុះហត្ថលេខា​លើលិខិតប្តូរសារ និងឯកសារចំនួន ២ ពាក់ព័ន្ធនឹង​សកម្មភា​ពបោស​សំអាតមីនរបស់កម្ពុជា។តាមរយៈនៃការចុះហត្ថលេខានេះ គឺ​រដ្ឋាភិបាល​ជប៉ុនផ្តល់នូវហិរញ្ញប្បទាន​ឥតសំណងបន្ថែមដែលមាន​ទឹកប្រាក់ជាង១០លានដុល្លារអាមេរិកដល់កម្ពុជា។

កាលពីព្រឹកថ្ងៃទី២០ ខែមីនា ឆ្នាំ២០២៥ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី ការបរទេស និងសហ​ប្រតិ​បត្តិការអន្តរជាតិ និង ឯកឧត្តម អ៊ូអិណុ អាត់ស៊ូស៊ី ( UENO Atsushi) ឯកអគ្គរាជ​ទូតវិសាមញ្ញ និងពេញសមត្ថភាព​នៃប្រទេសជប៉ុន ប្រចាំកម្ពុជា បានចុះហត្ថលេខាលើលិខិតប្តូរសារ និងឯកសារពាក់ព័ន្ធនឹងសកម្ម​ភាពបោសសំអាតមីន​របស់កម្ពុជា។

លិខិតប្តូរសារ និងឯកសារទាំងពីរនេះមាន៖១. ហិរញ្ញប្បទានឥត​សំណងរបស់រដ្ឋាភិបាលជប៉ុន ដែលមានទឹកប្រាក់ចំនួន ១.១៦៦​លានយ៉េន ឬប្រមាណ ៨,៣ លានដុល្លារអាមេរិកសម្រាប់គម្រោង ពង្រឹងសមត្ថភាពរបស់មជ្ឈមណ្ឌលសកម្មភាព​កំចាត់មីនកម្ពុជា (CMAC) លើការហ្វឹកហ្វឺន ក្រោមក្របខ័ណ្ឌកិច្ចសហប្រតិបត្តិការត្បូង-ត្បូង ។

២. ហិរញ្ញប្បទានឥតសំណងបន្ថែមរបស់រដ្ឋាភិបាលជប៉ុន ដែលមាន​ទឹកប្រាក់ចំនួន ៣០០លានយ៉េន ឬប្រមាណ ២,១ លានដុល្លារ សម្រាប់ការអនុវត្ត គម្រោងសាងសង់អគារហ្វឹកហ្វឺន និងផ្សព្វផ្សាយ​អប់រំ នៃមជ្ឈមណ្ឌលសកម្មភាពកំចាត់ មីនកម្ពុជា ។

រដ្ឋាភិបាលជប៉ុនបានបញ្ជាក់ថា ហិរញ្ញប្បទានឥតសំណងសម្រាប់​គម្រោងទាំងពីរខាងលើ នឹងរួមចំណែកដល់យុទ្ធសាស្ត្រ​ជាតិ សកម្មភាពបោសសំអាតមីនរបស់កម្ពុជាឆ្ពោះទៅសម្រេចបាននូវគោលដៅប្រទេសកម្ពុជាគ្មានមិន នៅឆ្នាំ២០៣០ ព្រមទាំងបញ្ជាក់ជាថ្មី នូវការប្តេជ្ញាចិត្តយ៉ាងមុតមាំរបស់ជប៉ុន ក្នុងការបន្តគាំទ្រដល់ ការអភិវឌ្ឍសេដ្ឋកិច្ច-សង្គម នៅកម្ពុជា ៕
ដោយ៖សួង ពិសិដ្ឋ