វ៉ាស៊ីនតោន ៖ យន្តហោះចម្បាំងជំនាន់ទី៦ មានឈ្មោះថា F-47 នឹងក្លាយជាយន្តហោះចម្បាំងខ្លាំងបំផុតដំបូងគេលើពិភពលោក និងគ្មានគូប្រៀបឡើយ នេះបើតាមការអះអាងរបស់ប្រធានាធិបតីអាមេរិក លោក Donald Trump កាលពីថ្ងៃសុក្រ អមដោយប្រមុខការពារជាតិអាមេរិកនៅឯសេតវិមាន។

មេដឹកនាំអាមេរិករូបនេះនិយាយថា Boeing គឺជាក្រុមហ៊ុនទទួលបានកុងត្រាផលិតយន្តហោះចម្បាំងដ៏ទំនើបបំផុតនេះ ក្នុងទំហំទឹកប្រាក់ ២០ ពាន់លានដុល្លារ សម្រាប់កងទ័ពអាកាសអាមេរិក។ យន្តហោះនេះនឹងត្រូវផលិតក្រោមគម្រោងឧត្តមភាពដែនអាកាសជំនាន់ថ្មី (NGAD)។

ហើយគម្រោងនេះ ត្រូវបានគេមើលឃើញថា ជាកិច្ចខិតខំប្រែងផលិតយន្តហោះថ្មីៗ ជំនួសកងយន្តហោះ F-22 Raptor ចាស់ៗ ដែលអភិវឌ្ឍចាប់តាំងពីឆ្នាំ ១៩៨០មកម្ល៉េះ។ រដ្ឋមន្ត្រីការពារជាតិអាមេរិក លោក Pete Hegseth បានព្រមានទៅសត្រូវថា សហរដ្ឋអាមេរិកមានសមត្ថភាពគ្រប់គ្រងអំណាចនៅទូទាំងពិភពលោក គ្មានអ្វីអាចរារាំងបានឡើយ ហើយទីក្រុងវ៉ាស៊ីនតោនក៏មិនបោះបង់ចោលសម្ព័ន្ធមិត្តរបស់ខ្លួនដែរ។

ចំណែកលោកឧត្តមសេនីយ៍ David W. Allvin អគ្គសេនាធិការកងទ័ពអាកាសអាមេរិកនិយាយថា យន្តហោះចម្បាំងថ្មីនេះ នឹងក្លាយជាជម្រើសមានតម្លៃថោកជាង និងទំនើបជាងយន្តហោះចម្បាំងបច្ចុប្បន្ន។ លោក Allvin បន្តថា បើធៀបនឹងយន្តហោះ F-22, យន្តហោះ F-47 នឹងចំណាយតិចជាង និង អាចសម្របខ្លួនបានខ្លាំងជាងមុន ទៅនឹងការគំរាមកំហែងនាពេលអនាគត ហើយយើងនឹងមាន F-47 កាន់តែច្រើននៅក្នុងឆ្នាំសារពើភ័ណ្ឌរបស់យើង។

ផ្អែកតាមសារព័ត៌មាន USA Today យន្តហោះ F-47 មានសមត្ថភាពហោះហើរបំបាំងកាយ ធន់ខ្លាំង និងទំនើបជាងយន្តហោះចម្បាំងជំនាន់ទី៥ ដូចជា F-22 និង F-35។ វាក៏នឹងបំពាក់នូវប្រព័ន្ធចាប់សញ្ញាទំនើប និងសមត្ថភាពធ្វើប្រតិបត្តិការរួមគ្នាជាមួយក្រុមយន្តហោះដ្រូន ហើយត្រូវបានរំពឹងថា វានឹងដាក់ឲ្យធ្វើប្រតិបត្តិការក្នុងអាណត្តិរបស់លោក Trump នេះតែម្តង ដោយសារតែលេខ ៤៧ គឺតំណាងឲ្យលោក Trump ជាប្រធានាធិបតីអាមេរិកទី ៤៧៕

ប្រភព ៖ AFP និង USA Today ប្រែសម្រួល ៖ ឈឹម ទីណា