វ៉ាស៊ីនតោន ៖ ហេតុការណ៍បាញ់ប្រហារទ្រង់ទ្រាយធំនៅទីក្រុង Las Cruces រដ្ឋ New Mexico បានផ្តាច់ជីវិតមនុស្ស ៣នាក់ និង ១៥នាក់ផ្សេងទៀតរងរបួស ខណៈដែលខ្មាន់កាំភ្លើងនៅពុំទាន់ត្រូវបានចាប់ខ្លួននៅឡើយទេ នេះបើតាមការអះអាងរបស់មន្រ្តីប៉ូលិសកាលពីថ្ងៃសៅរ៍។

ហេតុការណ៍បាញ់ប្រហារនេះ បានកើតឡើងនៅម៉ោងប្រហែល ១០យប់ថ្ងៃសុក្រ (ម៉ោងក្នុងតំបន់) នៅក្នុងទីក្រុង Las Cruces ស្ថិតនៅចម្ងាយប្រហែល ១២០គីឡូម៉ែត្រ ភាគខាងត្បូងនៃទីក្រុង Albuquerque ជាកន្លែងដែលមនុស្សប្រហែល ២០០នាក់បានប្រមូលផ្តុំគ្នាចូលរួមព្រឹត្តិការណ៍តាំងពិពណ៌ឡានប្រណាំង។

ស្នងការនគរបាលក្រុង Las Cruces លោក Jeremy Story និយាយថា ជម្លោះរវាងមនុស្ស ២ក្រុម បានបង្កឲ្យមានការផ្ទុះអាវុធរវាងភាគីទាំងពីរ ក្នុងពិព័រណ៍ឡានប្រណាំងនៅចំណតរថយន្ត Youth Park កាលពីល្ងាចថ្ងៃសុក្រ។

លោក Story បន្ថែមថា នគរបាលបានតាមចាប់ខ្លួនជនសង្ស័យ ប៉ុន្តែគ្មានការចាប់ខ្លួនណាមួយត្រូវបានធ្វើឡើងនោះទេ ហើយលោកបានជំរុញសាក្សីឲ្យផ្តល់រូបភាពវីដេអូឃ្លីបដែលពាក់ព័ន្ធ និងព័ត៌មានលំអិតដល់សមត្ថកិច្ច។

ដោយឡែក ប្រធានផ្នែកអគ្គិភ័យក្រុង Las Cruces លោក Michael Daniels និយាយថា ជនរងគ្រោះ មានអាយុចន្លោះពី ១៦ឆ្នាំ ដល់ ៣៦ឆ្នាំ ហើយអ្នករងរបួសមួយចំនួនត្រូវបានដឹកតាមឧទ្ធម្ភាគចក្រទៅកាន់មន្ទីរពេទ្យនៅទីក្រុង El Paso ខណៈអ្នករងរបួសផ្សេងទៀត ទទួលបានការព្យាបាលនៅកន្លែងកើតហេតុ។

គិតមកទល់ពេលនេះ ក្រុមមន្ត្រីអាមេរិកនិយាយថា ទីភ្នាក់ងារ FBI និងការិយាល័យគ្រឿងស្រវឹង ថ្នាំជក់ អាវុធ និងជាតិផ្ទុះ (ATF) របស់សហរដ្ឋអាមេរិកកំពុងជួយក្នុងការស៊ើបអង្កេតករណីបាញ់ប្រហារនេះ៕

ប្រភព ៖ AFP ប្រែសម្រួល ៖ ឈឹម ទីណា