សាណាអា ៖ ក្រុមហ៊ូទីនៅយេម៉ែន កាលពីថ្ងៃសៅរ៍ បានចេញមុខអះអាងពីការវាយប្រហារដោយមីស៊ីលផ្លោងលើព្រលានយន្តហោះ Ben Gurion របស់អ៊ីស្រាអែល ប៉ុន្តែយោធាអ៊ីស្រាអែលបានបាញ់កម្ទេចទាន់ពេល។

អ្នកនាំពាក្យយោធាក្រុមហ៊ូទីនៅយេម៉ែន បាននិយាយនៅក្នុងសេចក្តីថ្លែងការណ៍មួយថា ដើម្បីគាំទ្រប្រជាជនប៉ាឡេស្ទីននៅហ្គាហ្សា យើងបានកំណត់គោលដៅវាយប្រហារអាកាសយានដ្ឋាន Ben Gurion របស់អ៊ីស្រាអែល ដោយប្រើមីស៊ីលផ្លោងលឿនជាងសំឡេង។

អ្នកនាំពាក្យក្រុមហ៊ូទីបានពិពណ៌នាការវាយប្រហារនោះថា ជាប្រតិបត្តិការលើកទីបីប្រឆាំងនឹងអ៊ីស្រាអែលក្នុងរយៈពេល ៤៨ម៉ោង ហើយបានព្រមានក្រុមហ៊ុនអាកាសចរណ៍ថា ឥឡូវនេះ ព្រលានយន្តហោះគ្មានសុវត្ថិភាពទៀតទេ។

ក្រុមហ៊ូទីនៅយេម៉ែននេះ បបានអះអាងសាជាថ្មីទៀតថា ខ្លួននឹងនៅតែបន្តការវាយប្រហាររហូត ដល់ ការ ឈ្លានពាន ប្រឆាំង នឹង តំបន់ ហ្គាហ្សា បិទបញ្ចប់ ហើយក៏នឹងបន្តការវាយប្រហារលើគោលដៅរបស់អ៊ីស្រាអែល លុះត្រាតែជំនួយមនុស្សធម៌ត្រូវបានអនុញ្ញាតឲ្យចូលទៅក្នុងតំបន់ហ្គាហ្សា៕

ប្រភព ៖ AFP ប្រែសម្រួល ៖ ឈឹម ទីណា