តេហេរ៉ង់ ៖ ស្ថានភាពតានតឹងនៅមជ្ឈិមបូព៌ាកាន់តែឡើងកំដៅថែមមួយកម្រិតទៀត នៅពេលដែលឆ្មាំបដិវត្តន៍អ៊ីរ៉ង់បានបញ្ចេញប្រព័ន្ធមីស៊ីលស៊េរីថ្មីនៅលើកោះយុទ្ធសាស្ត្រចំនួន ៣ នៅឈូងសមុទ្រ មួយថ្ងៃក្រោយមេដឹកនាំអាមេរិក លោក ដូណាល់ ត្រាំ បានបញ្ចេញរូបរាងយន្តហោះចម្បាំងខ្លាំងក្លាបំផុតលើពិភពលោក។ នេះបើតាមការចេញផ្សាយដោយសារព័ត៌មានរដ្ឋអ៊ីរ៉ង់កាលពីថ្ងៃសៅរ៍។

ឆ្មាំបដិវត្តន៍អ៊ីរ៉ង់បានអះអាងថា ប្រព័ន្ធមីស៊ីលថ្មីនេះ អាចមានសមត្ថភាពវាយប្រហារកម្ទេចគោលដៅនានា ក្នុងចម្ងាយប្រហែល ៦០០ គីឡូម៉ែត្រ មិនថា ជាមូលដ្ឋានសត្រូវ នាវាចម្បាំង និងទ្រព្យសម្បត្តិមានតម្លៃក្នុងតំបន់។ អ៊ីរ៉ង់មានគំរោងដាក់ពង្រាយនៅលើកោះ Greater Tunb, Lesser Tunb និង Abu Musa នៅជិតច្រកសមុទ្រហ័រមូស (Hormuz) ដែលជាផ្លូវដឹកជញ្ជូនដ៏សំខាន់របស់ពិភពលោកមួយ។

ហើយថ្មីៗនេះ ឆ្មាំបដិវត្តន៍អ៊ីរ៉ង់ក៏ទើបបញ្ចប់ការធ្វើសមយុទ្ធយោធានៅក្នុងតំបន់នៅទីនោះផងដែរ។ ការបញ្ចេញប្រព័ន្ធមីស៊ីលថ្មីនេះទៀតសោត កើតឡើងចំពេលដែលអ៊ីរ៉ង់កំពុងត្រៀមខ្លួនឆ្លើយតបនឹងសារលិខិតរបស់លោកប្រធានាធិបតី ត្រាំ ដែលជំរុញឱ្យមានការចរចានុយក្លេអ៊ែរឡើងវិញ និងបានព្រមានប្រើកម្លាំងយោធា បើសិនអ៊ីរ៉ង់បដិសេធ។

ឆ្លើយតបលិខិតគំរាមរបស់លោក ត្រាំ មេដឹកនាំកំពូលអ៊ីរ៉ង់ លោក ខាមិនណេ បាននិយាយថា ការគំរាមកំហែងរបស់សហរដ្ឋអាមេរិកប្រឆាំងនឹងអ៊ីរ៉ង់ គឺជារឿងមិនទទួលបាន ហើយបានព្រមានថា ប្រសិនបើអាមេរិកហ៊ានធ្វើទង្វើអាក្រក់អ្វីមួយដាក់អ៊ីរ៉ង់ នោះពួកគេនឹងត្រូវទះកំផ្លៀងយ៉ាងធ្ងន់ធ្ងរត្រឡប់វិញ៕

ប្រភព ៖ AFP ប្រែសម្រួល ៖ ឈឹម ទីណា