តៃប៉ិ ៖ ឆ្មាំសមុទ្រតៃវ៉ាន់ បាននិយាយកាលពីថ្ងៃអាទិត្យថា ពួកគេបានរឹបអូសទូកចិនមួយគ្រឿង ដែលសង្ស័យថា បានផ្គត់ផ្គង់ប្រេងខុសច្បាប់ដល់ទូកនេសាទដែលបំពានដែនទឹកកោះតៃវ៉ាន់។

ប្រតិបត្តិការនេះធ្វើឡើងកាលពីថ្ងៃអាទិត្យ នៅឯឆ្នេរសមុទ្រភាគពាយព្យ ក្បែរទីក្រុង Taoyuan និង Hsinchu ភាគខាងត្បូងនៃរដ្ឋធានីតៃប៉ិ។ ឆ្មាំសមុទ្រតៃវ៉ាន់បន្តថា ទូកនេះគឺជាទូកមិនបានចុះបញ្ជីរបស់ចិន ដោយវាធ្វើប្រតិបត្តិការទាំងគ្មានឈ្មោះ គ្មានម៉ាកសម្គាល់ ហើយក៏គ្មានការចុះបញ្ជី និងគ្មានវិញ្ញាបនបត្រកប៉ាល់ផងដែរ។

ឆ្មាំសមុទ្រតៃវ៉ាន់បន្ថែមថា ទូកនេះបានដឹកប្រេងប្រហែល ៥០០.០០០លីត្រ ហើយបានព្យាយាមផ្គត់ផ្គង់ប្រេងដល់នាវាចិនផ្សេងទៀត ដែលឆ្លងចូលដែនទឹកកោះតៃវ៉ាន់ដោយខុសច្បាប់។ សមាជិកនាវិកទាំង ៦នាក់នៅលើទូកនោះ សុទ្ធតែជាជនជាតិចិនមិនមានឯកសារបញ្ជាក់អត្តសញ្ញាណ។ ក្រោយមកទូកនេះត្រូវបានរឹបអូសទៅរក្សាទុកនៅកំពង់ផែក្បែរទីក្រុងតៃប៉ិ ហើយសមាជិកនាវិកត្រូវបាននាំយកទៅសាកសួរចម្លើយ។

ការនេសាទខុសច្បាប់របស់ទូកចិន គឺជាក្តីកង្វល់ដដែលៗសម្រាប់កោះតៃវ៉ាន់ ដែលបានបង្កើនការល្បាត ដើម្បីទប់ស្កាត់ទូក និងសកម្មភាពដែលគ្មានការអនុញ្ញាត។ ឧប្បត្តិហេតុជាបន្តបន្ទាប់ដែលពាក់ព័ន្ធនឹងទូករវាងភាគីទាំងពីរ បានជំរុញឱ្យមានភាពតានតឹងឆ្លងកាត់ផ្លូវទឹកតូចចង្អៀតមួយនេះ៕

ប្រភព ៖ AFP ប្រែសម្រួល ៖ ឈឹម ទីណា