(ភ្នំពេញ)៖ប្រាក់រៀលរបស់ខ្មែរបានហក់ឡើងថ្លៃជាបន្ត​បន្ទាប់​មួយរយៈពេលមកនេះ បើធៀបទៅនឹងប្រាក់ដុល្លារ​របស់ប្រទេសសហរដ្ឋអាមេរិក។

ជាមួយការហក់ឡើងនេះត្រូវបានមន្រ្តីពាក់ព័ន្ធមួយចំនួនលើកឡើង ដោយសារតែបញ្ហានយោបាយរបស់​ប្រធានា​ធិបតីថ្មីរបស់ប្រទេសមហាអំណាចសហរដ្ឋអាមេរិកដឹកនាំដោយ លោក ដុលណា ត្រាំ ត្រូវបានគេបន្ទោសថា មិន​មាន​​​គោលនយោបាយច្បាសលាស់ ។ ដោយឡែក​មន្រ្តី​មួយ​ចំនួនរបស់កម្ពុជា ក៏បានពន្យល់ថាការឡើងថ្លៃប្រាក់​រៀល​​នាពេលនេះ ដោយសារតែតម្រូវការប្រាក់រៀល​ខ្មែរ​ច្រើនឡើង ពិសេស ដល់ពេលពលរដ្ឋបង់ពន្ធ ជិតពិធី​បុណ្យ​ចូលឆ្នាំប្រពៃណីខ្មែរ បុណ្យភ្ជុំបិណ្ឌជាដើម ដែល​ត្រូវបានពលរដ្ឋត្រូវការប្រាក់រៀលសម្រាប់ចាយវាយច្រើន ជាដើម។

គួរបញ្ជាក់ថាអត្រាប្តូរប្រាក់របស់ធានាគារជាតិកម្ពុជាសម្រាប់ថ្ងៃទី២៦ ខែមីនា ឆ្នាំ២០២៥ តម្លៃប្រាក់ដុល្លារអាមេរិក ១ដុល្លារដូរបាន ៤,០០២រៀល ។ អត្រាប្តូរប្រាក់នេះ​ឃើញ​ថា ធ្លាក់ថ្លៃជាងមុន ដោយអំឡុងពេលមុន ការប្តូរប្រាក់​មាន​អត្រាខ្ពស់ជាងនេះដោយ១ដុល្លារអាចដូរបានរហូតដល់៤០៥០ឬ៤១០០ជាងក៏មានផងដែរ។

ទាក់ទិនទៅនឹងការឡើងថ្លៃប្រាក់រៀលនេះដែរ លោក រ័ត្ន សោភ័ណ ប្រធានសមាគមធនាគារនៅកម្ពុជាបាន​បញ្ជាក់​ប្រាប់បណ្តាញសារព័ត៌មានក្នុងពិធី បើកកិច្ចពិភាក្សាជា​មួយ​អ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុស្តីពី​”ការចូលរួមផ្សព្វផ្សាយចំណេះដឹងហិរញ្ញវត្ថុ និងការប្រើ​ប្រាស់ឥណទានប្រកបដោយការទទួលខុសត្រូវ”នាសណ្ឋានគារ NOVOTELក្នុងរាជធានីភ្នំពេញនៅថ្ងៃទី ២៦ ខែ មីនា ឆ្នាំ២០២៥ឱ្យដឹងថា ៖ មានសូចនាករចំនួន២ ដែល​ល្អ គឺទី១អតិផរណាក្រោម១ភាគរយ និង អត្រាប្តូរប្រាក់​ដុល្លារ និង លុយខ្មែរមានលំនឹងល្អ ដែលនេះគឺជាប្រការ​មួយ​ល្អពោលគឺមិនបង្កឱ្យមានការប៉ះពាល់ដល់តម្លៃទំនិញ​ឡើងថ្លៃ ការប្តូរប្រាក់មិនមានការប្រែប្រួលច្រើន។ យើង​ឃើញថាការប្តូរប្រាក់ដុល្លារជាមួយលុយខ្មែរយើងក្នុងរយៈពេលប៉ុន្មានឆ្នាំនេះគឺមានលំនឹងល្អដោយស្ថិតនៅក្នុងរង្វង់១ដុល្លារប្តូរបានជាង ៤០០០រៀលជានិច្ច។

លោក រ័ត្ន សោភ័ណ ប្រធានសមាគមធនាគារនៅកម្ពុជា​បាន​លើកឡើងដែរថា”ហេតុអ្វី កាលពីថ្មីៗមកនេះប្រាក់​រៀលកម្ពុជាឡើងថ្លៃ? តាមពិតទៅ បើតាមការសង្កេត​របស់​ខ្ញុំគឺពេលត្រូវបង់ពន្ធ ឬបុណ្យចូលឆ្នាំគឺតម្រូវការប្រាក់​រៀល​ច្រើន ហេតុនេះទើបអត្រាប្តូរប្រាក់ប្រែប្រួល​ទៅតាមនោះ​ដែរ។សម្រាប់ថ្ងៃបុណ្យភ្ជុំបិណ្ឌ និងមួយទៀតប្រាក់រៀល​ឡើង​ថ្លៃនៅពេលកសិករយើងប្រមូលផល។ នេះជាការ​អង្កេតរបស់ខ្ញុំទេ”។

លោកបានបញ្ជាក់ថា សម្រាប់ការប្រែប្រួលត្រឹមកម្រិត​ប៉ុន​នេះ មិនមានប៉ះពាល់អ្វីច្រើនទេ គឺវាមានការប្រែប្រួលតិច​មែនទែន។

យ៉ាងណាក្តីប្រធានសមាគមធនាគារនៅកម្ពុជាបានពន្យល់ថា”សម្រាប់យើងការប៉ះពាល់គឺមកពីប្រាក់ដុល្លារឡើងថ្លៃខ្លាំងទៅវិញទេ ព្រោះដោយសារទំនិញយើងនាំចេញ​ឡើង​ថ្លៃ ​។ ជិត ៩០ភាគរយការចរាចរសេដ្ឋកិច្ច​របស់យើងប្រើ​ជា​ប្រាក់ដុល្លារ ផលប៉ះពាល់នេះដោយសារតែទំនិញ​យើង​នាំចេញវាឡើងថ្លៃ ។អ្នកទេសចរមកស្រុកយើងវាថ្លៃខ្ពស់​ដោយសារប្រាក់ដុល្លារឡើងថ្លៃនេះឯង។ ហេតុនេះការប្រែ​ប្រួល​តម្លៃប្រាក់រៀលក្នុងកម្រិតនេះគឺជាការប្រែប្រួល​បន្តិច​បន្តួចប៉ុណ្ណោះ ហើយទោះបី ១ដុល្លារប្តូរបាន ៣៧០០, ៣៨០០​ឬ ៣៩០០រៀល វាជាការប្រែប្រួលធម្មតា​មិន​មា​ន​អ្វីខុសប្រក្រតីច្រើននោះដែរ៕

អត្ថបទ ៖ ម៉ាដេប៉ូ
រូបភាព ៖ លោក ឈឹម ទីណា