បរទេស៖ លោកប្រធានាធិបតីសហរដ្ឋអាមេរិក Donald Trump បានច្រានចោលគំនិត របស់សមាជិកសភា ដែលទទូចឲ្យដកតំណែង រដ្ឋមន្ត្រីការពារជាតិ លោក Pete Hegseth ក្រោយពេលលេចមុខអ្នកសារព័ត៌មាន នៅក្នុងក្រុបឆាត ជជែកគ្នាអំពីផែនការសង្គ្រាម ថ្មីៗនេះ។

យោងតាមទីភ្នាក់ងារ Skynews កាលពីថ្ងៃពុធ បន្ទាប់ពីការបែកធ្លាយផែនការធ្វើសង្គ្រាមដល់ដៃអ្នកសារព័ត៌មាន សមាជិកសភា គណបក្សប្រជាធិបតេយ្យ លោក Hakeem Jeffries បានថ្លែងជំរុញឲ្យ Trump បណ្តេញរដ្ឋមន្ត្រីការពារជាតិ លោក Hegseth ជាបន្ទាន់ ដោយអះអាងថា ភាពជាអ្នកដឹកនាំនៅមន្ទីរបញ្ចកោណ បែបនេះ គំរាមកំហែងដល់សន្តិសុខជាតិធ្ងន់ធ្ងរ។ លោកថ្លែងចាត់ទុក លោក Hegseth ថា ជារដ្ឋមន្ត្រីការពារជាតិ ដែលអន់បំផុត ពុំធ្លាប់មាន ក្នុងប្រវត្តិសាស្ត្រអាមេរិក ហើយបានអំពាវនាវឱ្យបណ្តេញចេញពីតំណែង ជាបន្ទាន់។ លោកបានអះអាងថា ការបន្តវត្តមានរបស់លោកនៅក្នុងតំណែងកំពូល នឹង គំរាមកំហែងដល់សន្តិសុខរបស់ប្រទេស ហើយធ្វើឲ្យទាហានអាមេរិក នៅទូទាំងពិភពលោក ស្ថិតក្នុងគ្រោះថ្នាក់។

យ៉ាងណាមិញ លោក Trump បានថ្លែងពីសេតវិមានថា រឿងនេះមិនធ្ងន់ធ្ងរពេកទេ
ហើយមិនយល់ព្រម ចំពោះការស៊ើបអង្កេតពេញលេញ លើអ្វីដែលគណបក្សប្រជាធិបតេយ្យ បានហៅថា ជាការរំលោភលើសន្តិសុខដ៏ធ្ងន់ធ្ងរ ដែលទាមទារឱ្យមានការលាលែងពីតំណែង មន្ត្រីជាន់ខ្ពស់នោះ។

ប៉ុន្តែប្រធានាធិបតីអាមេរិករូបនេះ អះអាងថា ក្រុមមន្ត្រីរបស់លោកប្រហែលជាមិនបន្តប្រើប្រាស់ បណ្តាញទំនាក់ទំនង Signal ទៀតទេ។ គួរបញ្ជាក់ថា ថ្មីៗនេះ មានការច្រលំ add អ្នកយកព័ត៌មានម្នាក់ចូល ក្រុបឆាត Signal ដែលមន្ត្រីជាន់ខ្ពស់អាមេរិក កំពុងជជែកគ្នា ពីផែនការវាយប្រហារពួកឧទ្ទាម ហ៊ូធី នៅប្រទេសយ៉េមែន៕

ប្រភពពី Skynews ប្រែសម្រួល៖ សារ៉ាត