បរទេស៖ ក្រសួងការពារជាតិរុស្ស៊ីបានអះអាងថា យន្តហោះគ្មានមនុស្សបើក ឬ Drone របស់អ៊ុយក្រែន ត្រូវបានបាញ់ទម្លាក់ នៅសមុទ្រខ្មៅ អំឡុងប៉ុន្មានម៉ោង បន្ទាប់ពីមានការឯកភាព លើបទឈប់បាញ់ ក្រោមការសម្របសម្រួល ពីសហរដ្ឋអាមេរិក នេះបើតាមការចេញផ្សាយរបស់ទីភ្នាក់ងារព័ត៌មាន Skynews កាលពីថ្ងៃពុធ។

មន្ត្រីអាមេរិកបានជួបទាំងគណៈប្រតិភូរុស្ស៊ី និង អ៊ុយក្រែន នៅប្រទេសអារ៉ាប់ប៊ី សាអ៊ូឌីត កាលពីថ្ងៃអង្គារ ហើយភាគីទាំងពីរ បានព្រមព្រៀងគ្នា លើបទឈប់បាញ់ បណ្តោះអាសន្ន នៅសមុទ្រខ្មៅ និងការវាយប្រហារលើហេដ្ឋារចនាសម្ព័ន្ធថាមពល។ កិច្ចព្រមព្រៀងនេះ អាចជាជំហានដំបូង ឆ្ពោះទៅរកបទឈប់បាញ់ដ៏ទូលំទូលាយ ដែលមានសក្តានុពល។

ប៉ុន្តែ ក្រោយពេលប៉ុន្មានម៉ោងបន្ទាប់ ភាគីរុស្ស៊ីបានអះអាងថា យន្តហោះគ្មានមនុស្សបើករបស់អ៊ុយក្រែន ត្រូវបានបាញ់ទម្លាក់ នៅសមុទ្រខ្មៅ។
ប្រព័ន្ធផ្សព្វផ្សាយរដ្ឋរបស់រុស្ស៊ី TASS បានរាយការណ៍ថា Drone ចំនួន ៩គ្រឿង ត្រូវបានបំផ្លាញ នៅលើទឹកដីរុស្ស៊ី ពេញមួយយប់ រួមទាំង ៥គ្រឿង នៅក្នុងតំបន់ Belgorod, ២គ្រឿង នៅក្នុងតំបន់ Kursk និង២គ្រៀងទៀត នៅសមុទ្រខ្មៅ។

យ៉ាងណាមិញ អ៊ុយក្រែនមិនទាន់ធ្វើអត្ថាធិប្បាយ លើការអះអាងនេះ នៅឡើយទេ។ ប៉ុន្តែ ប្រធានាធិបតី Zelenskyy បាននិយាយ ក្រោយមានបទឈប់បាញ់ថា ទីក្រុងមូស្គូ អាចមានល្បិកល ខណៈដែលសហរដ្ឋអាមេរិកសន្យាថា នឹងជួយ ស្តារទីផ្សារទំនិញកសិកម្មរបស់រុស្ស៊ី ទៅកាន់ពិភពលោក ជាថ្នូរនឹងបទឈប់បាញ់នេះ។

ជុំវិញរឿងនេះ អ្នកវិភាគផ្នែកសន្តិសុខ របស់ Sky News លោក Michael Clarke បាននិយាយថា កិច្ចព្រមព្រៀងនៅសមុទ្រខ្មៅ គឺជាអ្វីដែលសហរដ្ឋអាមេរិក អាចមានអំនួត ប៉ុន្តែ នឹងមិនផ្លាស់ប្តូរអ្វីទាំងអស់។ សាស្ត្រាចារ្យ Clarke បន្ថែមថា លុះត្រាតែអាមេរិកត្រៀមខ្លួន ដាក់សម្ពាធលើរុស្ស៊ី ឲ្យបានខ្លាំង ទើបសង្គ្រាមនឹងមិនបន្តទៅមុខទៀត៕

ប្រភពពី Skynews ប្រែសម្រួល៖ សារ៉ាត