យោធិននារី ជាអតីតយុទ្ធកម្ពុជាខេត្តព្រះវិហារ ទទួលបានការយកចិត្តទុកដាក់ពី សម្តេចនាយករដ្ឋមន្ត្រី ហ៊ុន ម៉ាណែត
(ខេត្តព្រះវិហារ)៖ គំរូវីរភាពដ៏អង់អាចក្លាហាន របស់អតីតយុទ្ធជនកម្ពុជា ដែលកន្លងមកធ្លាប់ចូលរួមចំណែកក្នុងការកសាង រំដោះជាតិ មាតុភូមិ ឲ្យរួចផុតពីភ្លើងសង្រ្គាម ធ្វើឱ្យមានសុខសន្ដិភាព និងការអភិវឌ្ឍន៍លើគ្រប់វិស័យ រហូតមកដល់បច្ចុប្បន្ននេះ។
ជាការឆ្លើយតប សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងថ្នាក់ដឹកនាំកំពូលៗសមាគមអតីតយុទ្ធជនកម្ពុជា តែងតែគិតគូរចំពោះសុខទុក្ខ និងការរស់នៅរបស់បងប្អូនយោធិន អតីតយុទ្ធជន និងគ្រួសារអតីតយុទ្ធជនជានិច្ច។
លោកឧត្តមសេនីយ៍ទោ ច័ន្ទ សុភ័ក្រ្ដា មេបញ្ជាការតំបន់ប្របត្តិការសឹករងព្រះវិហារ និងជាប្រធានសមាគមអតីតយុទ្ធជនកម្ពុជាខេត្តព្រះវិហារ បានលើកឡើងបែបនេះ កាលពីថ្ងៃទី ២៦ ខែមីនា ឆ្នាំ២០២៥ ខណៈអញ្ជើញជួបសំណេះសំណាល សួរសុខទុក្ខ និងនាំយកអំណោយដែលជាគ្រឿងឧបភោគ បរិភោគ ដ៏ថ្លៃថ្លារបស់សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ផ្ដល់ជូនយោធិននារី អតីតយុទ្ធកម្ពុជាខេត្ត ជាច្រើនគ្រួសារ នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ស្ថិតនៅភូមិសំរោង សង្កាត់កំពង់ប្រណាក ក្រុងព្រះវិហារ ។ អំណោយដែលយោធិននារីទទួលបាននៅពេលនោះ រួមមាន៖ អង្ករ មី ត្រីខកំប៉ុង ទឹកត្រី ទឹកស៊ីអ៊ីវ រួមទាំងថវិកាមួយចំនួន ផងដែរ។
យោធិននារី ដែលជាអតីតយុទ្ធជនកម្ពុជា ខេត្តព្រះវិហារ បាន អរគុណយ៉ាងជ្រាលជ្រៅបំផុត និងគោរពជូនពរ សម្តេចធិបតី នាយករដ្ឋមន្ត្រី និងលោកជំទាវបណ្ឌិត រួមទាំង ថ្នាក់ដឹកនាំសមាគមថ្នាក់ខេត្តគ្រប់លំដាប់ថ្នាក់ ដែលតែងតែយកចិត្តទុកដាក់ គិតគូរជួយដល់អតីតយុទ្ធជនកម្ពុជាខេត្តគ្រប់ពេលវេលា ក្នុងពេលកំពុងជួបការលំបាក ខ្វះខាតក្នុងជីវភាពប្រចាំថ្ងៃ ៕
ដោយ៖ឡុង សំបូរ






